Փաստ ինֆո

Սյունիքից վերադարձի ճանապարհին մի քանի տասնյակ մարդիկ մեր ճանապարհը փակել են և փորձել խոչընդոտել մեքենայի ընթացքը: Նրանք որոշակի վերապահում ունեին Վազգեն Մանուկյանի վարչապետի թեկնածության և Հայրենիքի փրկության շարժման գործունեության հետ կապված, պահանջը ԲՀԿ-ից այն էր, որ դուրս գա այդ ձևաչափից: Այս մասին «Փաստինֆո»-ի հետ զրույցում ասաց ԱԺ «ԲՀԿ» խմբակցության պատգամավոր Իվետա Տոնոյանը:

«Երկու օր առաջ եղել ենք Սյունիքի մի շարք համայնքներում, ծանոթացել խնդիրներին, անվտանգության և սահմանազատման գործընթացի հետ կապված մտահոգություններին: Հանդիպել ենք նաև Գորիս, Կապան, Մեղրի քաղաքների քաղաքապետերի հետ և արձանագրել առկա խնդիրները: Այդ խնդիրները պրն.Ծառուկյանին ներկայացնելուց հետո, քանի որ շուռնուխցի տարհանված 12 ընտանիքների հետ կապված լրջագույն սոցիալական խնդիրներ կային, այսօր էլ, Գագիկ Ծառուկյանի հանձնարարությամբ, ես, Շաքե Իսայանը, Միքայել Մելքումյանը, Արտյոմ Ծառուկյանը աջակցությունները բերել ենք Շուռնուխ՝ օգնություն հասցնելու շուռնուխցի 12 ընտանիքին»,-ասաց Իվետա Տոնոյանը:

Վերջինս պատմեց, որ Սյունիքից դարձի ճանապարհին մի քանի տասնյակ մարդիկ իրենց ճանապարհը փակել են և փորձել են խոչընդոտել մեքենայի ընթացքը. «Մենք զրուցել ենք նրանց հետ, ներկայացրել ենք այցի նպատակը: Ես իրականում չեմ մեղադրում մեր հայրենակիցներին, խոսել ենք նրանց հետ, ճանապարհը բացել են, անցել ենք»,-ասաց ԲՀԿ պատգամավորը:

Իվետա Տոնոյանի փոխանցմամբ՝ այն անձինք, որոնք փակել էին ճանապարհը, որոշակի վերապահում ունեին Վազգեն Մանուկյանի վարչապետի թեկնածության և Հայրենիքի փրկության շարժման գործունեության հետ կապված, և պահանջը ԲՀԿ-ից այն էր, որ դուրս գա այդ ձևաչափից:

«Մենք բոլորին լսել ենք, և ասել ենք, որ իրենց մտահոգությունները կփոխանցենք»,-ասաց Տոնոյանը:

Հարցին՝ թե արդյոք ԲՀԿ-ն կքննարկի Հայրենիքի փրկության շարժման ձևաչափից դուրս գալու հարցը, Տոնոյանը պատասխանեց, որ եթե որոշում լինի, կհայտարարեն.

«Այդ միջադեպը րոպեներ առաջ է տեղի ունեցել, այս պահին որևէ բան չեմ կարող ասել, վստահաբար, մենք երբևէ որևէ կուլիսային գործընթացներով հանդես չենք եկել, ցանկացած որոշման մասին հանրությունը տեղյակ կլինի»,-ասաց Տոնոյանը:

Մեր այն դիտարկմանը, թե ԲՀԿ-ն վերջին շրջանում փորձում է առանձնանալ Հայրենիքի փրկության շարժումից, ինչի մասին է փաստում նաև մարզային առանձին այցերը, Իվետա Տոնոյանն ասաց.

«ԲՀԿ-ն առանձին քաղաքական հետագիծ ունեցող ուժ է և սահմանափակված չէ իր գործողություններում, տարօրինակ բան պետք չէ փնտրել, եթե հաշվի առնենք Գագիկ Ծառուկյանի բարեգործական գործունեությունը, պետք չէ որևէ ենթատեքստ փնտրել»:

Աղբյուր` Փաստինֆո