Փաստ ինֆո

Եթե Մոսկվան անկարող է գերիների հարցը լուծել, մեզ համար չափազանց խնդրահարույց է, թե ինչպես է Ռուսաստանը պատրաստվում տրանսպորտային ապաշրջափակման համալիր հարցերի լուծման երաշխավոր դառնալ։ Այս մասին ԱԺ-ում ասաց պատգամավոր Արման Բաբաջանյանը։ 

Պատգամավորի խոսքով՝ Հայաստանը պետք է հայտարարի, որ կարող է վերադառնալ մոսկովյան եռակողմ հայտարարության օրակարգին միայն այն պահին, երբ գերիների խնդիրը հիմնավորապես լուծված կլինի․ «Անցյալ շաբաթ Իգոր Պոպովի, նախօրեին Սերգեյ Լավրովի հայտարարությունները մի բանի մասին էին․ ամբողջությամբ պատերազմի պատասխանատվությունը գցել Հայաստանի, հայկական կողմի վրա»,-ասաց պատգամավորը։

Վերջինս նկատեց՝ որքան էլ տարօրինակ է, պատերազմում պարտությունը հնարավոր է եղել Հայաստանի համապատասխան գերատեսչությունների հանցավոր անգործության պատճառով․

«Առնվազն երկու գերատեսչություն այստեղ մեղավորություն ունի՝ արտաքին քաղաքական և պաշտպանական գերատեսչությունները։ Անձնապես այս պահին ուսումնասիրում եմ նամակագրական փոխանակումները Հայաստանի պաշտպանության նախկին նախարարի, փոխնախարարների, Դավիթ Գալստյանին պատկանող ընկերությունների և ռուսական սպառազինություն արտադրող ընկերությունների միջև։ Այդ նամակները բացահայտում են, որ Հայաստանի պաշտպանության նախարարությունն ուղիղ ռուսական ընկերություններից որակյալ և էժան սպառազինություն գնելու փոխարեն նախընտրել է գնումներ կատարել «Պատրոն Դավոյին» պատկանող օֆշորային ընկերություններից՝ մի քանի անգամ ավելի թանկ գներով»,-ասաց Արման Բաբաջանյանը՝ նշելով, որ անխտիր բոլորը պետք է պատասխանատվության ենթարկվեն։

Աղբյուր` Փաստինֆո