Փաստ ինֆո

Պոլսահայ հայտնի մտավորական, հրապարակախոս, «Ակօս» պարբերականի հիմնադիր խմբագրապետ Հրանտ Դինքի սպանությունից 14 տարի անց հանցագործությունը ամբողջությամբ չի բացահայտվել: Հրանտ Դինքը Թուրքիայում պայքարում էր հայերի իրավունքների, Հայոց ցեղասպանության շուտափույթ ճանաչման համար։ Նա խաղաղություն էր ուզում հայերի և թուրքերի միջև։

14 տարի առաջ ՝ 2007 թվականի հունվարի 19-ին, թուրք ազգայնական Օգյուն Սամասթի արյունոտ ձեռքով «Ակոս» թերթի խմբագրության առջև սպանվեց Հրանտ Դինքը։

Դինքի ընտանիքը, ընկերներն ու նրա իրավունքների պաշտպանությունը ստանձնած փաստաբանները շարունակում են պնդել, որ սպանությունը նախապես ծրագրված է եղել հանցավոր խմբավորման կողմից, իսկ պատկան մարմիններն էլ տեղյակ են եղել սպասվող մահափորձի մասին ու չեն կանխել այն:

Դինքը մեծացել էր որբանոցում,  խնամքին էին մնացել  երկու կրտսեր եղբայրները: Հետո իր մանկության որբանոցի խնամատարը դարձավ, ընկերներն ասում էին՝ Դինքը հարուստ էր, բայց այդպես էլ չդադարեց մնալ նույն համեստ, մաշված շորերով:

Դինքը մեկ անգամ չէ, որ իր համոզմունքների համար հալածվել է Թուրքիայում։  2005 թվականին դատապարտվել է վեցամսյա պայմանական բանտարկության։ Ամբողջ կյանքի ընթացքում սպառնալիքներ էր ստանում Թուրքիայում գործող ազգայնական խմբավորումներից, այդուհանդերձ, նա չէր վախենում հալածանքներից ու նորից շարունակում էր  իր գործունեությունը։

Հայ մտավորականը ամեն կերպ փորձում էր լույս սփռել աղավաղվող պատմության վրա, բացել թուրք ժողովրդի աչքերը, ցանկանում էր, որ նրանք կարողանան դեմ առ դեմ կանգնել պատմական ճշմարտության առաջ։

Հրանտ Դինքը Թուրքիայում հայոց ճշմարտության ձայնը բարձրացնողն էր։ Նա մշտապես ընդգծում էր, որ թուրք ժողովուրդը պետք է ճանաչի Հայոց ցեղասպանությունը` շեշտելով, որ դա հնարավոր կլինի, երբ Թուրքիան դառնա ժողովրդավար երկիր։

Վերջին հարցազրույցներից մեկում Դինքն ասել էր, թե վախենում է, երբ հանդես է գալիս ի պաշտպանություն Թուրքիայի ոչ միայն հայ, այլև բոլոր փոքրամասնությունների:

«Եթե ուզում եք իմանալ, այդ վախը ինձ հետապնդում է ամեն օր: Դուք երբևէ հետևե՞լ եք աղավնուն: Նա ամբողջ ժամանակ գլուխն է պտտում, ցնցվում է յուրաքանչյուր շրշյունից և պատրաստ է նվազագույն առիթի դեպքում թռչել հեռու: Դա չի կարելի կյանք անվանել, միայն թե ես, ի տարբերություն աղավնու, ոչ մի տեղ չեմ կարող թռչել»,- ասել էր Դինքը։

«Ակօս»-ի խմբագրության մոտ գտնվող ռեստորանի սեփականատերը, որը հանդես է եկել որպես վկա, ասել է, որ մարդասպանը եղել է մոտ 20 տարեկան, հագին եղել է ջինսե տաբատ, իսկ գլխին՝ գլխարկ։ Մարդասպանը, երբ լքելիս է եղել սպանության վայրը, բղավել է, որ ինքն սպանել է «գյավուրին»։ Մարդասպանը՝ Օգյուն Սամաստը, իր տված ցուցմունքում ասել է, որ սպանությունը կատարել է անձնական դրդապատճառներով և որևիցե կազմակերպություն կապ չունի սպանության հետ։ Սակայն Սամաստի հորեղբոր խոսքերով` նա չէր կարող այս հանցագործությունը միայնակ կատարել։ 

Դինքի հուղարկավորության ընթացքում մարդիկ սպիտակ աղավնիներ էին բաց թողնում: Ակօսի խմբագրատան առաջ, որտեղ սպանվել էր Դինքը, տասնյակ հազարավոր մարդիկ «Մենք բոլորս Հրանտ Դինք ենք», «Մենք բոլորս հայ ենք»պաստառներով դուրս էին եկել փողոց:

Հրանտ Դինքի սպանության գործով ձերբակալվել է երկու նախկին պետծառայող

Աղբյուր` Փաստինֆո