Փաստ ինֆո

«Ըստ իս, հիմա լավագույն ժամանակը չէ՝ որպես առաջնահերթություն սահմանել Արցախի կարգավիճակի հարցը, այն պետք է թողնել ապագային», հրավիրված հեռավար ասուլիսի ժամանակ հայտարարել է Ռուսաստանի արտգործնախարար Սերգեյ Լավրովն ավելացնելով, որ  երաշխավորում է, որ ռուս խաղաղապահների պատասխանատվության գոտին այն ձևաչափն է, որը կապահովի ինչպես ադրբեջանական, այնպես էլ հայկական կողմի շահերը:

«Գլխավորն այն է, որ դրանից հետո Հայաստանի և Ադրբեջանի միջև կարգավիճակի վերաբերյալ անցկացվեն կոնկրետ, հանգիստ, իրավական քննարկումներ` այն հիմքով, որն անհրաժեշտ է տարածաշրջանի բոլոր ժողովուրդների բարիդրացիության համար»,-նշել է Սերգեյ Լավրովը:

Ռուսաստանի արտգործնախարարը պատասխանելով լրագրողի հարցին հայտարարել է, որ որևէ հիմք չի տեսնում խոչընդոտելու Հայաստանի և Արցախի պաշտոնյաների շփումներին: Ըստ նրա, Մոսկվայի, Բաքվի և Երևանի միջև կնքված բոլոր համաձայնագրերում, առաջին հերթին `անցյալ տարվա նոյեմբերի 9-ի համաձայնագրում, կողմերը պայմանավորվել են ապահովել Հայաստանի և Լեռնային Ղարաբաղի միջև կապը Լաչինի միջանցքով, ինչը վերահսկելու են ռուս խաղաղապահները:

«Ոչ ոք երբեք չի ժխտել Հայաստանի և Արցախի կապը: Տասնամյակների բանակցությունների ընթացքում երբեք չի եղել Հայաստանն ու Արցախը տարանջատելու հարց, այդ պատճառով էլ Լաչինի միջանցքը, որպես հայեցակարգ, ոչ ոք չի մերժել: Այն դեռ շարունակում է մնալ համաձայնության ենթակա թեմա», - ասել է Լավրովը, հավելով, որ՝ «Եթե բոլորը համամիտ են, որ պետք է կապ գոյություն ունենա Արցախի և Հայաստանի հայերի միջև, ապա որևէ հիմք չկա կանխելու այս մակարդակի շփումները»։

Այս առումով նա նաև նշել է, որ Հայաստանի պաշտոնյաները ԼՂ-ում ընդգրված են հումանիտար հարցերի լուծման մեջ, ինչը որևէ բացասական վերաբերմունք չի առաջացնում Բաքվում:

Լավրովի խոսքերով՝ հավանաբար լարվածություն է առաջացնում այն փաստը, որ Հայաստանի պաշտոնյաները բավականին քաղաքականացված հայտարարություններ են անում Արցախում.

«Ես կարծում եմ, որ ավելի լավ կլինի խուսափել դրանից: Մենք տեսանք թե 44-օրյա պատերազմից առաջ քաղաքական գործիչների զգացմունքային հայտարարությունները Ղարաբաղից կամ Ղարաբաղի թեմայով ինչ հետևանքներ ունեցան, ինչպես օրինակ՝ «նոր պատերազմ, նոր տարածքներ» արտահայտությունը: Խոսքերը նյութականանալու հատկություն ունեն, իսկ այս դեպքում դրանք նյութականացան բացասական ուժով: Այս պարագայում երկու կողմերի արտահայտությունները դարձել են շատ բացասական նյութական ուժ: Ուստի, մենք այժմ այդքան մեծ ուշադրություն ենք դարձնում Ադրբեջանի և Հայաստանի ղեկավարության միջև կապեր հաստատելուն՝ վստահության մթնոլորտ ստեղծելով: Սա նաև ՌԴ նախագահ Պուտինի, Հայաստանի ու Ադրբեջանի ղեկավարների մասնակցությամբ տեղի ունեցած հանդիպման կարևոր նպատակներից էր», - ասել է ՌԴ ԱԳՆ ղեկավարը:

Աղբյուր` Փաստինֆո