Փաստ ինֆո

Խորհրդարանում քննարկվում է «Հակակոռուպցիոն կոմիտեի մասին» և կից ներկայացված օրենքների մասին նախագծերի փաթեթն առաջին ընթերցմամբ ընդունելու մասին հարցը։

ՀՀ արդարադատության նախարար Ռուստամ Բադասյանը նշեց, որ նախագծերի փաթեթով առաջարկվում է ստեղծել նոր քննչական մարմին՝ հակակոռուպցիոն կոմիտե, որի հիմնական իրավասությունը լինելու է ՀՀ քրեական դատավարության օրենսգրքով իր ենթակայությանը վերապահված ենթադրյալ կոռուպցիոն հանցագործությունների մինչդատական քրեական վարույթի կազմակերպումը և իրականացումը․ «Հակակոռուպցիոն կոմիտեն իրականացնելու է օպերատիվ հետախուզական գործունեություն։ Կոմիտեի մասնագիտական կազմը համալրվելու է համապատասխան մասնագիտական պատրաստում անցած կադրերի ներգրավման եղանակով, ընդ որում կոռուպցիոն հանցագործությունների քննությամբ զբաղվող քննիչների հաստիքների և գործիքակազմի փոխանցումը չի կրելու մեխանիկական բնույթ։ Հակակոռուպցիոն կոմիտեի կազմում նշանակումները, այդ թվում ղեկավար կազմի, կատարվելու են բաց մրցույթի արդյունքում»,-ասաց Ռուստամ Բադասյանը։

Նախարարը նշեց, որ ի տարբերություն այլ քննչական մարմինների՝ հակակոռուպցիոն կոմիտեի ծառայողների համար սահմանված են առավել խիստ պահանջներ և սահմանափակումներ․ «Ըստ այդմ նախատեսված են նաև գործունեության լրացուցիչ երաշխիքներ։ Սա պայմանավորված է մի քանի հանգամանքով, նախ կոմիտեն իրականացնում է կոռուպցիոն հանցագործությունների քննություն, որն ունի բարձր ռիսկայնություն, երկրորդ՝ կոմիտեի ծառայողների վարձատրությունն ուղղակիորեն հանդիսանում է վերջինիս անկախության և անկաշկանդ գործելու երաշխիքներից մեկը։ Վաձատրությունն ավել ենք նախատեսում, որովհետև ավելի խիստ պահանջներ են լինելու, այդ թվում առնվազն մեկ օտար լեզվի պարտադիր իմացություն։ Քանի որ ակնկալում ենք պետությանը միլիոնավոր դոլարների վնաս պատճառած անձանց մասով գործի քննություն և նման պրոֆեսիոնալիզմ, դրա համար նախատեսում ենք այնպիսի աշխատավարձ, որը բխում է տվյալ աշխատանքն անելու էությունից»,-ասաց Ռուստամ Բադասյանը։

Աղբյուր` Փաստինֆո