Փաստ ինֆո

Մի քանի տասնյակ մարմին կա, որոնց ինքնությունը չի հաջողվել դեռ պարզել, չնույնականացվելու դեպքում կհանձնեն թուրքերին, այս մասին ֆեյսբուքյան ուղիղ եթերում հայտարարել է անհետ կորած զինծառայողի հարազատ Արսեն Ղուկասյանը՝ կոչ անելով անհետ կորած զինվորների հարազատներին ԴՆԹ թեստ հանձնել։

«Պատկերացնու՞մ եք՝ մերոնք լինեն ու տան թուրքին», - ասել է Արսեն Ղուկասյանը։

Նշենք, որ 2020 թվականի պատերազմի հետեւանքով անհետ կորած էին համարվում Ա.Ղուկասյանի եղբայրն ու եղբորորդին, եւ տեւական որոնումների արդյունքում նրան հաջողվել է գտնվել եղբոր մարմինը, սակայն զարմիկից տեղեկություն չկա։Նա մի քանի այլ ծնողների հետ գտնվում է Արցախում՝ տեղում մասնակցելու, հետեւելու իրականացվող որոնողական աշխատանքներին։

Դեկտեմբերի 17-ին ուղիղ եթերում Ղուկասյանը մտահոգություն է հայտնել արդեն հայտնաբերված զինծառայողների մարմինների վերաբերյալ, մասնավորապես, նշելով, որ ԴՆԹ փորձաքննության ենթարկված, նույնիսկ դեմքով ճանաչելի մարմիններ կան, սակայն տևական ժամանակ գտնվում են դիահերձարաններում, հարազատները չեն մոտեցել, չեն ճանաչել։

Նրա խոսքով՝ արդեն օրական 25 մարմնի ԴՆԹ թեստ է արվում, որ մարմիններն այսպես չմնան։
«Խնդրում եմ՝ գնացեք, ԴՆԹ թեստ հանձնեք։ Եթե տեսնեն, որ այդ մարմինների ԴՆԹ-ները որևէ մեկի հետ չի համընկնում, կմտածեն թուրքի մարմին է, կտանեն, կտան թուրքին։ Պատկերացնու՞մ եք՝ հանկարծ հայ երեխու մարմին լինի, մերոնք իրենց ձեռքով տան թուրքին, քանի որ որևէ մեկի հետ չի համընկնում ԴՆԹ անալիզը»,- նշեց Ղուկասյանը։

Նրա փոխանցմամբ՝ 50 մարմնի ԴՆԹ-ն արված է, տերերը չեն կարողանում գտնել, իսկ թեստ տված մարդկանց անալիզների հետ չի համընկնում։

Անհետ կորած մեկ ուրիշ զինվորի հայրն էլ կոչ արեց չպառակտվել, լինել միասնական այնպես, որ յուրաքանչյուրիս սիրտը նույն հարցի շուրջ բաբախի, որովհետև կորցրել ենք տարածքներ, կորցրել ենք հզոր, գանձ, առյուծ երեխաներ, չպետք է ուրանանք նրանց, որ նրանք երկնքից նայեն ու իմանան, որ զուր չեն զոհել իրենց կյանքը։
«Այդ երեխեքի արյան հոտը դեռ այդ սարերից գալիս է»,- նշեց նա։

Մանրամասները՝ տեսանյութում։

Աղբյուր` Փաստինֆո