Փաստ ինֆո

Իշխանությունը պետք է փոխվի ժողովրդի միջոցով։ Ժողովուրդը պետք է ոտքի կանգնի: Այս մասին Վանաձորում քաղաքացիների հետ հանդիպման ժամանակ հայտարարել է «Հայրենիքի փրկության» շարժման միասնական թեկնածու Վազգեն Մանուկյանը:

Վազգեն Մանուկյանն արտահերթ ընտրությունները որակեց կեղծ գաղափար՝ վստահեցնելով, որ Նիկոլ Փաշինյանի օրոք ընտրությունը նշանակում է վերարտադրել իշխանությունը.

«Նիկոլ Փաշինյանը միայնակ չէ, ունի թիմ, դա՝ «Իմ քայլը» չէ, դա մոտ 20 հոգանոց խումբ է, որոնց մի զգալի մասը տարբեր երկրների լրտեսներ են, որոնք իրականացնում են դրսի ծրագրեր, որոնց գաղափարները հարիր չեն մեր ժողովրդին»,-ասաց Վազգեն Մանուկայնը:

Վերջինս նշեց, որ երկրի ղեկավար ընտրելիս պետք է ուշադրություն դարձնել, որ  այդ մարդը գոնե բարձրագույն կրթություն ունենա, ինչ-որ տեղ աշխատած լինի, որպեսզի հնարավոր լինի գնահատել.

«Նիկոլ Փաշինյանն ամենակոռումպացված թղթակիցներից է, բոլորը դա գիտեն: Ես թղթակիցներին մեղադրում եմ, որ այն ժամանակ, երբ ժողովուրդը չէր իմանում այդ մասին, ընտրում էր Նիկոլին, այդ մասին չասացին»,-ասաց «Հայրենիքի փրկության» շարժման միասնական թեկնածուն՝ վստահեցնելով, որ եթե իշխանությունը չփոխենք, Հայաստանը դատապարտված է:

Անդրադառնալով գերիների խնդրին և պատասխանելով դահլիճից հնչող հարցերին, Մանուկյանն ասաց, որ Ադրբեջանն ուզում է գերիներին օգտագործել քաղաքական նպատակների համար.

«Գերիների հարցն իրոք բարդ է, բայց մեզ կարող է օգտակար լինել այդ հարցում առաջինը՝ Ռուսաստանը, երկրորդը՝ միջազգային կազմակերպություններն են, որոնց պետք է ներգրավել, երրորդը` Հայաստանի ղեկավարությունն է, բայց ոչ Նիկոլ Փաշինյանի դեպքում: Պետք է հաշվի առնել, որ Ադրբեջանն ուզում է այդ գերիներին օգտագործել քաղաքական նպատակների համար։ Նա նրանց գերի չի համարում  և ցանկանում է դատել: Բայց եթե երկրի ղեկավարը կպած լիներ գործին, իմ կարծիքով՝ այդ հարցը հիմնականում կարելի էր լուծել»,-ասաց Վազգեն Մանուկյանը:

ՀՅԴ Հայաստանի Գերագույն մարմնի ներկայացուցիչ, Հայրենիքի փրկության շարժման համակարգող Իշխան Սաղաթելյանն էլ, փակելով հանդիպումը, վստահեցրեց, որ իրենց պայքարը կանգ չի առնելու և հասնելու են հաղթանակի՝ հանուն հայրենիքի և հանուն պետութան:

Աղբյուր` Փաստինֆո