Փաստ ինֆո

Երբեմն ասում են, եթե Փաշինյանը գնա և ուրիշները գան, պատերազմը վերսկսելու են։ Ոչ, ո՞վ կարող է սկսել պատերազմ նման բանակով: Հայաստանն ու Արցախը երբեք պատերազմ չեն նախաձեռնել, բայց պատերազմ երբ եղել է, մենք կարողացել ենք ջարդել ու գնալ առաջ: Այս մասին վանաձերցիների հետ հանդիպման ժամանակ ասաց «Հայրենիքի փրկության շարժման» միասնական թեկնածու Վազգեն Մանուկյանն՝ ընգծելով որ առաջին հերթին անհրաժեշտ է վերականգնել, զինել բանակը և վերսկսել Մինսկի եռանախագահների հետ բանակցությունները.

«Ռուսաստանը մեր ռազմավարական դաշնակիցն է, սակայն ի՞նչ ենք արել այս 2.5 տարիների ընթացքում. Մի կողմից վարչապետը գնում և քծնում էր այնպես, որ նախկին ոչ մի ղեկավար չի քծնել, մյուս կողմից անընդհատ գրգռում էր Ռուսաստանի և նրա ղեկավարի արժանապատվությունը»,-ասաց Մանուկյանը՝ կարևորել նաև Չինաստանի և Իրանի հետ հարաբերությունները:

Վազգեն Մանուկյանն արձանագրում է, որ երկրի ներսում անվտանգությունն ապահովված չէ, քանի որ, ըստ նրա, Հայաստանում տարբեր երկրների լրտեսական ցանցեր կան, այդ թվում նաև՝ Թուրքիայի, որոնք սողոսկում են իշխանության մեջ.

«ԱԱԾ-ն փոխանակ սրանով զբաղվի, զբաղված է թե ով, ինչ մեքենա է գնել և ինչ փողով: Լուրջ կազմակերպությունը, որը պետք է պաշտպաներ մեր երկիրը ներսից, սկսել են օգտագործել զուտ մանր քաղաքական խնդիրներ լուծելու համար»,-ասաց Մանուկյանն՝ ընգծելով, որ առանց Ազգային անվտանգության ուժեղ ծառայության երկիրը ներքուստ ապահովված չի կարող լինել:

Վազգեն Մանուկյանի խոսքով՝ Հայաստանում կան սորոսական և ոչ սորոսական կազմակերպություններ, որոնք գումար են ստանում և երիտասարդների մեջ համապատասխան հոգեբանություն են ներշնչում:

«Ժամանակավոր կառավարության առաջնային խնդիրը ԱԱԾ-ի գործառույթների վերականգնումը պետք է լինի»,-ասաց Մանուկյանը:

Աղբյուր` Փաստինֆո