Փաստ ինֆո

Այն, ինչ մենք արել ենք ռազմի դաշտում, դրա գնահատականը տրվել է ՊԲ հրամանատարության կողմից, տեսել են պատերազմում մասնակցած մարդիկ։ Այն ստահոդ տեղեկությունները, որոնք մշտապես փորձում են տարածել իմ և  կողմնակցիներիս մասին բանականություն ունեցող որևէ մարդ չի կարող այդ ստերին հավատալ: Այս մասին Հայրենիքի փրկության շարժման առաջնորդների վանաձորյան հանդիպումից հետո լրագրողների հետ զրույցում ասաց ԱԱԾ նախկին տնօրեն, «Հայրենիք» կուսակցության ղեկավար, Արթուր Վանեցյանը՝ արձագանքելով Արգիշտի Քյարամյանի հայտարարությանը, թե «Հայրենիք» կուսակցության ջոկատը պատերազմի ժամանակ լքել է Շուշիի պաշտպանական դիրքերը։

«Դասալիքն իրենք են՝ իրենց կյանքով, իրենք փախել են ամեն ինչից, իրենք պարտվել են այս պատերազմը, իրենց պատճառով կորցրել ենք մեր հայրենիքի Արցախյան հատվածի 70 %-ը, ունենք 5 հազարից ավելի զոհված, 10 հազար վիրավոր, անհետ կորածներ, գերիներ, անվտանգային խարխլված համակարգ»,-ասաց Վանեցյանը:

Արթուր Վանեցյանը լրագրողների հետ զրույցում ասաց, որ երբ Արգիշտի Քյարամյանը նշանակվել է ԱԱԾ տնօրեն, ինքը հայտարարել է, որ նրա նշանակումը սպառնալիք է ազգային անվտանգությանը.

«Ցավոք, այդ կանխատեսումս իրականություն դարձավ։ Բայց ես այդ մասին չէի խոսի, որովհետեւ մենք ռազմի դաշտում պատահաբար հանդիպել ենք Արգիշտիի հետ եւ ես ասել եմ, որ բոլոր տարաձայնությունները պետք է դնել մի կողմ, լծվել մեկ գործի եւ պաշտպանել հայրենիքը։ Եթե նա խախտում է այդ պայմանավորվածությունը, որը  տղամարդուն վայել չէ, եթե պատվերներ է կատարում՝ դա առավել ևս հարիր չէ տղամարդուն»։

Արթուր Վանեցյանն ընգծեց, որ պատերազմի ընթացքում «Հայրենիք» զորախումբն ամբողջությամբ ներգրավված է եղել ռազմական գործողություններին։ 

«Մենք մարտնչել ենք ամենադժվար և ամենաթեժ տեղերում, չենք խուսափել, ու խնդրում եմ՝ փակենք այդ թեման», ասել է Արթուր Վանեցյանը՝ հավելելով, որ պատերազմի ժամանակ իրենց գործողություններին արդեն գնահատական տվել է Շուշիի մատույցներում Շոշի հատվածի պաշտպանության պատասխանատու գեներալ-լեյտենանտ Լևոն Մնացականյանը և ԱԱԾ տնօրենի ԺՊ Միքայել Համբարձումյանը։

Արթուր Վանեցյանը նաև ընգծեց, որ «Հայրենիքի փրկության շարժման» մարզային հանդիպումները կրելու են մշտական բնույթ.

«Մենք պայքարելու ենք մինչեւ վերջ, մինչեւ ազատվենք այս իշխանություններից։ Մենք ունենք մեր օրակարգը և դրա շուրջ իրականացնելու ենք մեր գործողությունները»,-ասաց Արթուր Վանեցյանը:

Վերջինիս գնահատմամբ՝ լոռեցիների հետ հանդիպումը շատ ջերմ մթնոլորտում է անցել և հետաքրքրիր հարցեր են հնչել:

Արթուր Վանեցյանը հերքել է մամուլում շրջանառվող այն լուրերը, թե հանդիպում է ունեցել Նիկոլ Փաշինյանի հետ։ նրա համոզմամբ՝ նման լուրերի տարածումը նպատակ ունի շեղել կարևոր հարցերից:

Աղբյուր` Փաստինֆո