Փաստ ինֆո

Երբ խոսք է գնում փոխվարչապետերի մակարդակով աշխատանքներ իրականացնելու մասին, կարծես թե գերիների հարցը պետք է ինքնաբերաբար լուծվեր։ Այս մասին այսօր մամուլի ասուլիսի ժամանակ ասաց պատմաբան Հայկ Դեմոյանը։

«Կարծում եմ՝ գերիների հարցն ընդամենը մեկ րոպեում խոսելու և հանձնարարություններ տալու խնդիր էր Մոսկվայում։ Ադրբեջանը Հայաստանից ի՞նչ ստանալիք ունի, որ այս հարցը դեռևս չլուծված կարգավիճակում է։ Կարծում եմ՝ այս դեպքում երրորդ կողմին պետք է դիմենք, տվյալ դեպքում ռուսական կողմին՝ ներկայացնելով խնդիրը որպես երկու ստորագրված փաստաթղթերի խախտում։ Այլ բարդություն չեմ տեսնում, եթե իհարկե գերիների հետ կապված բանավոր պայմանավորվածություններ չկան»,-ասաց պատմաբանը՝ ընդգծելով, որ եթե գնում է հարաբերությունների նոր փուլի արձանագրում, այն է միջպետական հանձնաժողովների ստեղծում, ճանապարհների ապաշրջափակում, ապա այս գործողություններին խոչընդոտող հանգամանքներ չպետք է լինեն։

Անդրադառնալով ադրբեջանական կողմի պահվածքին՝ Հայկ Դեմոյանը հետաքրքրվեց՝ ո՞վ է պատասխանելու Ադրբեջանի քարոզչական, տեղեկատվական գրոհին․ «ՀՀ-ում կա՞ մարմին, իշխանական ներկայացուցիչներ, որոնք գոնե կարձագանքեն այդ շարունակական գործողություններին։ Ամեն օր Բաքվից հրապարակ են նետվում տեղեկատվական ռումբեր, որոնց պատասխան չկա»,-նշեց Հայկ Դեմոյանը։

Աղբյուր` Փաստինֆո