Փաստ ինֆո

«Ադրբեջանը տարիներ շարունակ ջանք ու եռանդ չի խնայել աստղաբաշխական թվերի հասնող նավթադոլարներով կաշառել «ՅՈւՆԵՍԿՕ»-ին և ոչ միայն այդ միջազգային կառույցին: Ինչ վերաբերում է մասնավորապես «ՅՈւՆԵՍԿՕ»-ին, ապա հայտնի փաստ է՝ Ալիևի կինը՝ Մեհիբան Ալիևան «ՅՈւՆԵՍԿՕ»-ի անդամ է: Այստեղ՝ Փարիզում շատ բարձրաստիճան պետական քաղաքական գործիչներ կան, ովքեր լիովին Ադրբեջանի ազդեցության տակ են: Արդեն ավելի քան 5-6 տարի շարունակ նրանք կաշառքների տեսքով տարատեսակ նվերներ և գումարներ են ստանում, այստեղ առաջ տանելու համար ադրբեջանական կողմի շահերը,-ասում է ֆրանսիահայ դերասան և ռեժիսոր Սերժ Ավեդիքյանը, «Փաստինֆո»-ի հետ զրույցում անդրադառնալով Բաքվի վերջին արգելքներին՝ թույլ չտալու «ՅՈւՆԵՍԿՕ»-ի փորձագետներին անձամբ այցելելու Արցախում՝ վերջիններիս վերահսկողության տակ հայտնված եկեղեցիներ և գնահատելու պատմական ժառանգության շուրջ ստեղծված իրավիճակը։ Այս մասին «Известия»-ի հետ զրույցում մտահոգություն էր հայտնել Գարեգին Երկրորդ Ամենայն հայոց կաթողիկոսը,- Ֆրանսիայում ադրբեջանական կողմի շահերը սպասարկող տասնյակ քաղաքական գործիչների անուններ կարող եմ տալ:

Դրանից մեկն, օրինակ, այս պահին Փարիզում բարձր քաղաքական պաշտոն զբաղեցնող, իսկ ժամանակին՝ նախարար և Ազգային ժողովի նախագահ աշխատած Ժան Լյուի դը Բղեն է, ով կաշառված է ոչ միայն Ադրբեջանի, այլ նաև Թուրքիայի կողմից և հետևաբար, այստեղ առաջ է տանում ադրբեջանա – թրքական շահը: Մի քանի տարի առաջ մենք փորձեցինք այստեղ՝ ֆրանսիայում նախագիծ ընդունել, որով Ցեղասպանության ժխտումն օրենքով արգելված կլիներ, ինչպես որ Հոլոքոստի պարագայում է: Այսինքն, այստեղ ապրող բազմաքանակ թուրքերն այլևս չէին կարող ցուցեր անել և հայտարարել, թե 20-րդ դարասկզբին իրենց կողմից իրականացված ոճրագործությունը տեղի չի ունեցել: Նախագիծն անցավ Ազգային ժողովում և հավանության արժանացավ այնտեղ, պետությունն ընդունեց, իսկ իր գլխավորությամբ ղեկավարվող կառույցը, որ վերջին հաստատող պետական օղակը պետք է լիներ՝ ուղղակի մերժեց այն: Ահա այսպես են Ադրբեջանն ու Թուրքիան լուծում իրենց քաղաքական հարցերը՝ աշխարհի տարեր երկրներում, այդ թվում նաև միջազգային տարատեսակ կառույցներում, որոնցից մեկն էլ ձեր կողմից նշված «ՅՈւՆԵՍԿՕ»-ն է»,- ասում է ֆրանսիահայ վավերագրողը:

Ռեժիսորը պատմում է՝ հենց երեկ է ինքը խոսել «ՅՈւՆԵՍԿՕ»-ի հայաստանյան ներկայացուցիչ՝ Քրիստիան Տեր - Ստեփանյանի հետ, ով այս օրերին Փարիզում է և ում Սերժ Ավեդիքյանը մոտ երեք շաբաթ առաջ զանգահարել ու խնդրել է, որ «ՅՈւՆԵՍԿՕ»-ի փարիզյան կենտրանական գրասենյակում հանդիպում կազմակերպի իր ու կառույցի տնօրինուհու՝ Օդրի Ազուլեի հետ, որին ռեժիսորն ինքը ճանաչում է դեռևս վերջինիս՝ փարիզյան Կինոկենտրոնում աշխատելու տարիներից. «Քրիստիան Տեր – Ստեփանյանն ինձ փորձում էր համոզել, որ այդ հանդիպումն անիմաստ է լինելու, որ ես գործ չունեմ «ՅՈւՆԵՍԿՕ»-ի տնօրինության հետ, այնինչ, ես ցանկանում էի որպես վավերագրող և վկա՝ միանալ «ՅՈւՆԵՍԿՕ»-ի՝ Արցախ կատարելիք առաջիկա այցին, որն ի դեպ, ինչպես արդեն պարզվեց ադրբեջանական կողմի ակտիվ նախաձեռնությամբ տապալվել է: Ես ուզում էի լուսանկարներով վավերագրել իրենց Արցախ կատարելիք այցն ու աշխատանքը և ապացուցել, որ պատմամշակությաին արժեքների պահպանման առաքելությունը ստանձնած միջազգային կառույցն, իսկապես, աշխատանքներ է կատարում՝ ադրբեջանական ռազմական օկուպացիայի արդյունքում հակառակ կողմում հայտնված հայկական հուշարձանների պահպանության ուղղությամբ, սակայն, ինչպես հասկացա, դա ինձ չհաջողվեց»:

Ինչո՞ւ, այնուամենայնիվ, հայկական կողմին, որ այս պարագայում ներկայացնում էր ֆրանսահայ ռեժիսոր և վավերագրող Սերժ Ավեդիքյանը, չհաջողվեց միանալ նախատեսվելիք, բայց արդեն իսկ չկայացած այցին: Ռեժիսորը վստահ է՝ սա բացառապես մեկ բացատրություն ունի՝ «ՅՈւՆԵՍԿՕ»-ում ընդգրկված և այդ կառույցը ներկայացնող հայաստանյան ներկայացուցիչներն, ուղղակի, խաղից դուրս վիճակում են և սա չափազանց ցավալի իրողութուն է:

Հեղինակ՝ Նվարդ Մանվելյան

Աղբյուր` Փաստինֆո