Փաստ ինֆո

Թշնամու վերահսկողության ներքո անցած «Կատարո» գինու գործարանի հիմնադիրներին պատճառված վնասը մոտ մի քանի միլիոն դոլարի է հասնում։ Գործարանի ամբողջ տեխնիկան, մեծաքանակ գինին մնացել են Հադրութի շրջանի Տող գյուղում։ Հաջողվել է գործարանից դուրս բերել միայն գինու փոքր խմբաքանակ։

«Փաստինֆո»-ի հետ զրույցում «Կատարո» գինու գործարանի տնօրեն Գրիգորի Ավետիսյանն ասաց՝ փոխհատուցում տալու նպատակով կառավարությունից դեռ ոչ ոք իր հետ կապ չի հաստատել․ «Չգիտեմ՝ փոխհատուցում տալու են, թե՝ ոչ։ Պատկերացում չունեմ, թե այդ ընթացակարգն ինչպես է իրականացվում։ Ես էլ չեմ գնացել ինչ-որ մեկին հարցրել՝ ինչ է լինելու։ Մարդիկ հիմա չեն կարողանում դիակները գտնել, իսկ ես գնամ փոխհատուցումից խոսեմ, ճիշտ չի լինի»,-նշեց Գրիգորի Ավետիսյանը ու նկատել, որ ԱՀ և ՀՀ կառավարությունները ֆինանսապես անկայուն վիճակում են և չի կարծում, որ կարող են օգնել առավել եւս, երբ շատերն իր նման կորցրել են իրենց ունեցվածքը։ Նրա խոսքով թնշամու վերահսկողության ներքո է անցել 2-3 գինու գործարան, բազմաթիվ այլ բիզնեսներ։

Հարցին՝ արդյոք «Կատարո» գինու գործարանը կառուցելու համար վարկային միջոցներ ներգրավվել էին՝ Գրիգորի Ավետիսյանն ասաց․ «Ցավն այն է, որ ոչ մի վարկ չեմ վերցրել։ Ամբողջ կյանքում աշխատել, ներդրել եմ այդ ամբողջը գործարանի մեջ և հիմա ամբողջ ունեցածս մնացել է այնտեղ։ Գոնե վարկ լիներ, հանգիստ կլինեի, կասեի՝ ձեր վարկը չեմ տալիս»,-նշեց Գրիգորի Ավետիսյանը։

Վերջինս նշեց՝ հաշվապահներն այժմ գույքագրում են, հաշվարկներն ընթացքի մեջ են և դեռ հստակ չէ պատճառված վնասի չափը, սակայն Գրիգորի Ավետիսյանի խոսքով մոտ մի քանի մլն դոլարի վնաս կլինի։

Հարցին՝ հնարավոր չէ՞ր արդյոք դիմել կառավարությանը և գործարանից տեխնիկան դուրս բերել, «Կատարո»-ի տնօրենն ասաց, որ թշնամին իրենց գյուղ հոկտեմբերի 21-22-ին է մտել․ «Ժամանակ տալիս էին, երբ հայկական կողմի վերահսկողության տարածքներն էին հանձնվում։ Երբ հայտարարությունը ստորագրել են, մեր գյուղն արդեն թուրքի վերահսկողության տակ էր»,-ասաց Գրիգորի Ավետիսյանը։

Անդրադառնալով ադրբեջանական կողմի տարածած այն տեսանյութերին, որտեղ երևում է՝ ինչպես են ադրբեջանցիները գինու գործարանում թափում գինիները, Գրիգորի Ավետիսյանն ասաց, որ սկզբնական շրջանում տարածված տեսանյութում երևացող գործարանը «Կատարոն» չէր․ «Այս վերջում երկու կարճ տեսանյութ տարածվեց, որտեղ տակառ են շուռ տալիս։ Ճանաչել եմ, դա իմ տակառն է, իմ գործարանը»,-ասաց Գրիգորի Ավետիսյանը՝ վստահեցնելով, որ փորձելու են վերականգնել գործարանը․ «Կատարոն նորից վերականգնելու ենք։ Այնպես չէ, որ այս ամենով վերջացավ»,-ամփոփեց գործարանի տնօրենը։

Աղբյուր` Փաստինֆո