Փաստ ինֆո

ՀՀ տարածքում նոր սահմանների գծումն իրականացվում է զինված ուժերի կողմից օգտագործվող տեղագրական քարտեզների վրա։ Այս մասին «Փաստինֆո»-ի հարցմանն ի պատասխան հայտնել են վարչապետի աշխատակազմի տեղեկատվության և հասարակայնության կապերի վարչությունից, առանց հստակեցնելու, թե ո՞ր թվականի քարտեզն է հիմք ընդունվել եւ ինչու։

Ավելի վաղ՝ դեկտեմբերի 23-ին «Փաստինֆո»-ն գրավոր հարցումներ էր ուղարկել պաշտպանության, արտաքին գործերի, տարածքային կառավարման եւ ենթակառուցվածքների նախարարություններ՝ պարզելու իրականացվող սահմանազատման աշխատանքների իրավական հենքը, սակայն նշված գերատեսչությունները փորձել էին խուսափել հարցերին պատասխանելուց, թաքցնել տեղեկությունը, թե նոր սահմանազատումը քանի՞ մարզի, համայնքի վրա է ազդելու, ո՞ր թվականի քարտեզի հիման վրա են այդ աշխատանքները կատարվում։ Խնդրել էինք հերքել կամ հաստատել, որ սահմանազատումն իրականացվում է 1974 թվականի քարտեզի հիման վրա, սակայն պատասխան չէինք ստացել։

Ավելին՝ սլաքներն ուղղում էին միմյանց ու ՀՀ կառավարության վրա։ ՊՆ-ից հայտնել էին, որ պետական սահմանի սահմանազատման և սահմանագծման ոլորտում աշխատանքները կազմակերպում է ՀՀ կառավարության որոշմամբ ստեղծված միջգերատեսչական աշխատանքային խումբը՝ ՀՀ արտաքին գործերի նախարարության համակարգմամբ։ ՀՀ ԱԳՆ-ից եւս խուսափել էին հարցերին պատասխանել՝ ստելով, թե վարչապետը այդ հարցերին անդրադարձել է հարցազրույցներից մեկում։ ՏԿԵ-Ն եւս սլաքներն ուղղել էր դեպի կառավարություն, իսկ կառավարությունից էլ սլաքները վերադարձրել են ՊՆ-ին։

Այսպես, հաշվի առնելով գերատեսչությունների խուսափոխական վարքագիծն ու Նիկոլ Փաշինյանի հայտարարությունը, որ Հայաստանի ու Ադրբեջանի միջեւ սահմանազատումն իրականացվում է «բանավոր ըմբռնման» հիման վրա՝ այս տարվա հունվարի 7-ին գրավոր հարցում էինք ուղարկել նաեւ ՀՀ կառավարություն՝ խնդրելով տեղեկացնել թե՝ ե՞րբ եւ ու՞մ միջեւ է ձեռք բերվել պայմանավորվածությունը, ո՞ր երկրի քարտեզի հիման վրա է իրականացվում սահմանազատումը։ «Այս պահին պետական սահմանի երկայնքով մարտական հերթապահություն իրականացնելու նպատակով զինված ուժերի կամ սահմանապահ զորքերի տեղակայումը բացառապես պաշտպանական և անվտանգային բնույթի միջոցառում է, որը անմիջականորեն կամ միջնորդավորված բանակցվում է զինված ուժերի ներկայացուցիչների միջև՝ զինված ուժերի կողմից օգտագործվող տեղագրական քարտեզների վրա»,- «Փաստինֆո»-ին պաշտոնապես հայտնել են ՀՀ կառավարությունից։

Հետաքրքիրն այն է, որ ՊՆ-ն առաջարկել էր սահմանազատման հարցերով դիմել ԱԳՆ ու կարծես տեղյակ չէր, որ իրականում ինքն է գծում սահմանները ու ինքն է պայմանավորվել Ադրբեջանի զինված ուժերի հետ, թե ինչ քարտեզի հիման վրա պետք է գծվեն նոր սահմանները։

Ինչեւէ, կառավարությունը պաշտոնապես հայտարարել է, թե Հայաստանի Հանրապետության և Ադրբեջանի Հանրապետության սահմաններին իրականացվող միջոցառումները պետական սահմանների սահամանագծում կամ սահմանազատում չեն համարում։ Նշում են, որ դրանք չեն առնչվում կարգավիճակային հարցերին և չեն կարող մեկնաբանվել որպես սահմանագծման և սահմանազատման շուրջ վերջնական համաձայնություն, կամ գոյություն ունեցած վարչական սահմանների մեխանիկական հաստատում։

Հիշեցնենք, որ ՀՀ տարածքային կառավարման և ենթակառուցվածքների նախարարությունից պատասխան ևս չէինք ստացել թե քանի՞ մարզի, բնակավայրի են նախազգուշացրել հնարավոր սահմանազատումների վերաբերյալ։ Կամ թե քանի՞ ԿՄ ճանապարհահատված է անցել ադրբեջանական հսկողության տակ, քանի՞ հեկտար արոտավայր է կորցրել ՀՀ-ն, որքա՞ն է կազմում վնասի գումարը, երբ է նախատեսվում նոր ճանապարհների կառուցումը՝ նախարարությունն անգամ այս հարցերի պատասխանը չուներ՝ նշել էին, թե դրանք միջգերատեսչական կարգավորման տիրույթում են ու առաջարկել էին դիմել ՀՀ կառավարություն։

Հետևելով ՏԿԵ նախարարության խորհրդին, դիմել ենք Կառավարություն՝ այս հարցերի պատասխանը ստանալու համար։

«Համապատասխան գերատեսչությունների կողմից գնահատվել են քաղաքացիների կրած վնասները, որոնք ՀՀ կառավարության կողմից փոխհատուցվում են։ Գործընթացը կրում է շարունակական բնույթ»,-պատասխանել են վարչապետի աշխատակազմից ու չեն պատասխանել վերոնշյալ հարցերին։ Կառավարությունը չէր մասնավորեցրել, թե որոնք են համապատասխան գերատեսչությունները, երբ օրինակ՝ ոլորտի պատասխանատու Տարածքային կառավարման ու ենթակառուցվածքների նախարարությունն անտեղյակ է պատճառված վնասների մասին։ 

Շարունակելի

Աղբյուր` Փաստինֆո