Փաստ ինֆո

Արգիշտի Քյարամյանը ԱԱԾ տնօրենի պաշտոնից ազատվելուց հետո վերադարձել է Արցախ, եղել տարբեր տեղերում, այդ թվում՝ Շուշիի հրամանատարական կետում,- «Փաստինֆո»-ի հետ զրույցում ասել է ՀՀ պաշտպանության նախկին նախարար, գեներալ-գնդապետ Սեյրան Օհանյանը։

«Ես, գտնվելով Արցախում, աջակցել եմ աշխարհազորի ձևավորմանը՝ օրենսդրական դաշտի և իրավապայմանագրային ընթացակարգերի հստակեցման ուղղությամբ, եղել եմ բոլոր շրջաններում, նաև՝ Շուշիում, հրամանատարներին աջակցություն եմ ցուցաբերել, նաև որոշակ զորահավաքային խնդիրներում»,- նշել է գեներալ-գնդապետը՝ ավելացնելով, որ Արգիշտի Քյարամյանը ԱԱԾ տնօրեն եղած ժամանակ, ինչպես նաեւ պաշտոնից ազատվելուց հետո, Արցախ վերադառնալով, մշտապես իր հետ է եղել, նաև՝ Շուշիի հրամանատարական կետում:

Հիշեցնենք, որ երեկ Քյարամյանը Հանրային Հեռուստաընկերությանը տված հարցազրույցում հայտարարել է, որ Շուշիից դուրս է եկել մոտ մեկ տասնյակ անձանց հետ՝ հատուկ շեշտելով, որ Սեյրան Օհանյանի հետ Շուշիից հեռացել են նույն մեքենայով:

Պարոն Օհանյանը մեզ հետ զրույցում ասաց, որ Շուշիից դուրս են եկել նոյեմբերի 5-ի լույս 6-ի առավոտյան, գնացել են Ստեփանակերտ, իսկ Երևան վերադարձել ամսի 7-ի երեկոյան։

«Ստեփանակերտում ինքն այլ խնդիրներ է կատարել, մենք Շուշիիում ենք միայն միասին եղել, երբ գնացել ենք Ստեփանակերտ, արդեն տարբեր խնդիրներ ենք կատարել: Հրամանատարական կետում գտնվելու ժամանակ պարոն Քյարամյանը, ճիշտ է ասում, որ ինքը շատ հարցերում տեղի հրամանատարին աջակցել է, հրամանատարի և իմ խնդրանքով հանդերձավորվել է և գնացել , խնդիրներ կատարել՝ տեղակայման և տեղում խնդիրները ճշտելու համար: Երբ որոշում ընդունվեց Շուշիից հրամանատարական կետը տեղափոխել,որը արդեն մի քանի կողմից շրջափակման մեջ էր գտնվում, մենք դուրս ենք եկել պրն. Քյարամյանի հետ, մեզ հետ էլի մարդիկ են եղել, և ինչպես ինքը նշեց, նույն մեքենայով։ Հավելեմ, որ ամսի 7-ի երեկոյան Արցախի նախագահի խնդրանքով ես շտապ մեկնել եմ Երևան՝ զենքի, սպառազինության հետ կապված խնդիրներով, այդ ժամանակ էլ Քյարամյանը ինձ հետ վերադարձել է Երևան: Մնացած հարցերը, քանի որ մանրուքները իրենք են տիրապետում, հարցրեք իրենց»,-ասաց Սեյրան Օհանյանը:

Աղբյուր` Փաստինֆո