Փաստ ինֆո

Ես ամենևին չեմ խոսել օրինական քաղաքացիություն ստանալու մասին, Արգիշտի Քյարամյանը բացատրում է քաղաքացիություն ստանալու գործընթացը՝ ՀՀ-ում։ Երբ ես խոսում եմ ապօրինի անձնագրերի մասին, դա նշանակում է, որ անձնագիր է տրվել՝ առանց քաղաքացիություն ստանալու։ Այս մասին «Փաստինֆո»-ի հետ զրույցում ասաց «Ազգային անվտանգություն» կուսակցության նախագահ Գառնիկ Իսագուլյանը։

Քյարամյանը հայտարարել էր, թե նշված գործընթացն առնվազն կարող է տևել 6 ամիս, իսկ ինքն ավելի կարճ ժամանակահատվածում է ղեկավարել ԱԱԾ-ն, ինչի կապակցությամբ էլ Իսագուլյանը նշեց, որ խոսքը գնում է ոչ թե մի քանի ամսվա, այլ՝ 2.5 տարվա մասին։

«Նա մոռանում է, որ մինչ այդ շատ լուրջ պաշտոն էր զբաղեցնում՝ ՊՎԾ պետի տեղակալ էր, որը պաշտոնավարում էր ՊՎԾ ղեկավարի պաշտոնում, մոռանում է, որ Մարտունու անձնագրային վարչության պետն իրեն շատ մտերիմ մարդ է, այսինքն, մտերիմ մարդկանց նշանակել է տվել տարբեր պաշտոններում։ Խոսքը չի գնում ընդամենը 3 ամսվա մասին։ Հեղափոխությունից անմիջապես հետո նա եղել է ամենաազդեցիկ մարդկանցից մեկը և իր մարդկանց տեղավորել է տարբեր տեղերում աշխատելու, այդ թվում՝ անձնագրային վարչություններում»,- նշեց Իսագուլյանը։

Վերջինիս փոխանցմամբ՝ նախ պետք է պարզել, թե քանի անձնագիր է տպվել 2.5 տարում, ինչքան է եղել պատրաստի, դրանից քանիսն է տրվել օրինական ճանապարհով և ինչքան անձնագիր է հիմա պակասում այդ տրցակից։

Նրա խոսքով՝ համեմատելու դեպքում կպարզվի, որ ինքը քիչ թիվ է ասել, խոսքը գնում է 10 հազարավոր անձնագրերի մասին։

«Կարող եմ ասել՝ շատերը որտեղ են օգտագործել։ Շատերին որպես կացության վկայական անձնագիր էին տալիս, որ այդ մարդիկ կարողանային ավտոմեքենաներն առանց մաքրազերծելու տանեին Ղազախստան և այլ երկրներ։ Դրա մասին Անդրանիկ Հովհաննիսյանը հեռուստաեթերում Ղազախստանից ութ հոգու անուն է տալիս, որոնք ադրբեջանցիներ են և շատ լավ գիտեն հայերեն։ Օրինակ՝ ինչու են Անդրանիկին արտաքսել Հայաստանից, Քյարամյանը փորձե՞լ է պարզել»,- նշեց Իսագուլյանը։

Ըստ նրա՝ միայն երեկվա հարցազրույցը բավարար է, որ Քյարամյանի դեմ առնվազն 10-15 քրեական գործ հարուցվի։

Անդրադառնալով Քյարամյանի պնդումներին, թե ինքը սկսել է քննադատել Քյարամյանին՝ որդու աշխատանքից ազատումից հետո՝ Իսագուլյանը նշեց, որ ի սկզբանե հայտարարել է, որ չի կարելի ԱԱԾ համակարգից դուրս անձին, որը «վառոդի» հոտ չի զգացել երբևէ, նշանակել ԱԱԾ տնօրեն, իսկ իր որդուն աշխատանքից ազատել են երկու ամիս անց։

«Այո, իմ տղան իր դիմումի համաձայն է ազատվել, վերջիններս ստոր մեթոդներով էին գործում։ Նախ՝ իրեն արտաքսել են Երևանից սահման, որտեղ իր ծառայությունը եղել է գերազանց, իսկ հետո սկսվել են ծառայողական քննություններ, ամեն օր Վարդենիսից հրավիրում էին Երևան։ Կպատմեմ, թե ինչպես են ստիպել, երբ իր կուրսեցիներին ատեստացիայով հեռացնելու մեղավորությունը փորձում էին բարդել որդուս վրա, իրեն չէին կարող հեռացնել ատեստացիայով, քանի որ ինքն արդեն անցել էր այդ գործընթացները։ Ասել են՝ իր կուրսընկերներին հերթով կկանչեն ատեստացիայի, աշխատանքից կհեռացնեն և մեղքն իրենն է լինելու։ Տղաս էլ զանգեց և ասաց, որ իր պատճառով ուզում են բոլորին աշխատանքից ազատել »,- նշեց Իսագուլյանը՝ հավելելով, որ դա եղել է Քյարամյանի ուղղակի հրահանգը, վերջինս էլ այդ հրահանգը ստացել է Նիկոլ Փաշինյանից։ Իսագուլյան էլ որդուն խորհուրդ է տվել՝ ազատվել աշխատանքից սեփական դիմումի համաձայն։

«Ասեցի՝ տղա ջան, որ ուրիշների հացին վայս չլինելու համար, միևնույն է, ընկել են հետևիցդ, մի բան սարքելու են, լավ է՝ տղաս չի խմում, չի ծխում, ճանապարհին կարող էր նաև վթար լինել, ավելի լավ է սեփական դիմումի համաձայն դուրս արի, մեկ է՝ ինչ- որ բան են սարքելու»,- նշեց Իսագուլյանը։

Այս ամենից զատ Իսագուլյանը հետաքրքրվեց, թե պատերազմի ընթացքում Քյարամյանը որպես ով է մտել շտաբ, եթե ինքն արդեն ԱԱԾ տնօրեն չէր։

«Լավ, Նիկոլի կնիկը մտել է, հասկացանք, բայց քեզ որպես ում են թողել, որ մտնես շտաբ։ Մի քանի անգամ ասում է՝ գնացել է շտաբ, բայց որպես ով է ինքն իրավունք ունեցել մարդկանց տեղաբաշխելու, ինչ իրավունք ուներ իմանալու, թե ինչ օպերացիա պետք է լինի Շուշիում։ Ասում է՝ որպես քաղաքացի, բայց ամեն քաղաքացի իրավունք ունի՞ մտնելու շտաբ, իրավունք ուներ մարդկանց տեղաբաշխելու տարբեր վայրերում։ ՝ Շուշիում որտե՞ղ է խրամատ փորել, կարո՞ղ է տանել այդ տեղը ցույց տալ։ Ես պատրաստ եմ, կարող եմ տանել իրեն, իր հետ մտնել Շուշի, եթե ինքը ոչինչ չի հասկանում, ես կհասկացնեմ իրեն։ Թող տանի ցույց տա, թե Շուշիի մեջ որ ասֆալտն է քանդել ու խրամատ փորել»,- նշեց Իսագուլյանը՝ հավելելով, որ սուտն այնքան հանգիստ են ասում, ինքը զարմանում է, թե ինչպես կարող է ամենամեծ դավաճանն այդքան հանգիստ ստեր պատմել։

Ինչ վերաբերում է Քյարամյանի պնդմանը, թե ԱԱԾ տնօրեններն իրենց գործընկերների հետ խոսում են միջնորդավորված, Իսագուլյանը նշեց, որ վերջինս անգամ հասարակ բաներ չգիտի, հակառակը, երկու հատուկ ծառայության պաշտոնատար անձանց միջև չի կարող լինել միջնորդավորված կապ։

«Ինքը մի բառ լսել է, չի հասկացել իմաստը։ Ոչինչ, ինքն այդ համակարգում միանգամից որպես տնօրեն է եղել, ինքը չգիտի, թե ինչ է համակարգը։ Մյուս տնօրենները գոնե համակարգում աշխատել են երկար ժամանակ»,- նշեց Իսագուլյանը՝ հավելելով, որ Քյարամյանը գնացել էր մեր տվյալները հակառակորդին հաղորդելու համար։

Նրա խոսքով՝ ԶՈՒ ԳՇ նախկին պետ Մովսես Հակոբյանին թույլ չեն տվել մտնել շտաբ, Քյարամյանին՝ թույլ են տվել, պետք է հասկանալ՝ ով է նա, որ թույլ են տվել, որտեղից նրան այդ տեղեկությունները։

Ըստ Իսագուլյանի՝ Քյարամյանն ինքն իր դեմ ցուցմունք է տվել իր հարցազրույցով և, եթե իր դեմ քրեական գործ չհարուցվի, չդատեն նրան, պետք է պարզաբանումներ տա։

Աղբյուր` Փաստինֆո