Փաստ ինֆո

«Ես միանշանակ համամիտ եմ պարոն Պոպովի հետ, որ Արցախի կարգավիճակը եղել է հակամարտության կարգավորման կարևոր սկզբունք, ավելացնեմ՝ եղել և մնում է»,- այս մասին ԱԺ արտաքին հարաբերությունների հանձնաժողովի անդամների հետ հանդիպումից հետո լրագրողներին  հայտնել է ՀՀ ԱԳ նախարար Արա Այվազյանը՝ անդրադառնալով ԵԱՀԿ ՄԽ ռուսաստանցի համանախագահ Իգոր Պոպովի հայտարարությանը, որ ԼՂ հիմնախնդրի կարգավորումը Ռուսաստանը երբեք չի դիտարկել որպես Ադրբեջանին 7 շրջանների վերադարձի հարց՝ անտեսելով կարգավիճակի խնդիրը:

«Ժամանակին Հայաստանը համաձայնություն էր տվել Կազանի փաստաթղթին, քանի որ այն պարունակում էր հակամարտության կարգավորման հիմնարար սկզբունքների ամբողջական փաթեթը: Ադրբեջանի կողմից այդ փաստաթղթի մերժումից հետո էլ բանակցությունները շարունակվել են հիմնարար սկզբունքների հիման վրա։ Ավելին՝ նույնիսկ պատերազմի ժամանակ Ադրբեջանի կողմից համաձայնություն էր տրվել շարունակելու բանակցությունները հիմնարար սկզբունքների շուրջ:

Ես միանշանակ համամիտ եմ պարոն Պոպովի հետ, որ Արցախի կարգավիճակը եղել է հակամարտության կարգավորման կարևոր սկզբունք, ավելացնեմ՝ եղել և մնում է: Նոյեմբերի 9-ի հայտարարությունը կարգավորման փաստաթուղթ չէ, դա զինադադարի, պատերազմի ավարտի մասին փաստաթուղթ է, որը ներառում է հիմնարար սկզբունքներից մի քանիսը։ Սակայն հակամարտությունը չի կարող կարգավորված համարված լինել, քանի որ այն չի իրականացրել բոլոր հիմնարար սկզբունքները, մասնավորապես՝ ինքնորոշման, կարգավիճակի հարցը: Ուզում եմ ընդգծել համանախագահների կողմից դեկտեմբերի 3-ի հայտարարությունը, որում կարևորվում է հիմնարար սկզբունքների հիման վրա համապարփակ կարգավորումը»,- նշել է նախարարը:

Վարչապետի կամ Պոպովի հայտարարություններին նախարարը մանրամասն մեկնաբանություն չտվեց, իսկ հարցին՝ արդյոք Պոպովի հայտարարությունը չի՞ հակասում վարչապետի հոդվածին, Այվազյանը պատասխանեց.

«Վարչապետն ասել է՝ ինչ որ ասել է, Պոպովը մեկնաբանել է։ Վարչապետի գրածը հանել է կոնտեքստից, վարչապետն ուրիշ բան էլ է ասել։ Ուշադի՛ր կարդացեք՝ ի՛նչ է գրել վարչապետը, և ի՛նչ է ասել Պոպովը: Եկեք չկենտրոնանաք մեկնաբանությունների վրա։ Մեզ համար կարգավիճակի հարցը եղել և մնում է հակամարտության կարգավորման հիմնարար տարրը»:

Նախարարը անդրադարձավ նաև ռազմագերիների հարցին՝ նշելով, որ այսօր էլ խնդիրն առաջնային է, որը հեշտ լուծում չի գտնում։

«Մենք ունենք միջգերատեսչական աշխատանքային խումբ և բոլոր խողովակներով ամենօրյա ռեժիմով աշխատանք ենք տանում։ ԱԳՆ-ն ևս առիթը բաց չի թողնում, որպեսզի հարցը լինի բոլորի ուշադրության կենտրոնում։ Կա ըմբռնում, որ տարածաշրջանում պետք է հաստատվի խաղաղություն և զարգացում, սակայն որպեսզի դա տեղի ունենա, անհրաժեշտ է վստահությոան մթնոլորտ ձևավորել։ Եվ եթե Ադրբեջանը չի կարողանում իր պարտականությունը կատարել հումանիտար խնդրի շուրջ՝ մենք դժվար ենք պատկերացնում, որ մնացած բոլոր խնդիրները կարող են կյանքի կոչվել»։

Նախարարը կոչ արեց վստահել իրենց ջանքերին ու վստահեցրեց, որ հարցը դրական լուծում կստանա։

«Բոլորս հասկանում ենք, որ եթե այդ հարցը մեկ օրվա մեջ լուծում ստացած լիներ, ապա վաղուց լուծված էր»,- ասաց Այվազյանն անդրադառնալով հարցին, թե ինչո՞ւ նոյեմբերի 9-ին ռազմագերիների հարցը վերջնական չլուծվեց։

Աղբյուր` Փաստինֆո