Փաստ ինֆո

Նոյեմբերի 10-ից հետո կտրուկ նվազել են «Հայաստան» համահայկական հիմնադրամին կատարվող հանգանակությունները։ Այս մասին «Փաստինֆո»-ի գրավոր հարցմանն ի պատասխան տեղեկացրել են հիմնադրամից։

«Նոյեմբեր, դեկտեմբեր ամիսներին Ամերիկայի և Եվրոպայի շատ երկրների հայ համայնքներում կազմակերպվել են լոկալ դրամահավաքներ, որի արդյունքում հավաքագրվել է 26 մլն դոլար»,- նշել են հիմնադրամից։

Մինչդեռ մինչեւ նոյեմբերի 10-ը հավաքագրվել էր մի քանի անգամ ավելի շատ գումար՝ 170 .688 601.25 ԱՄՆ դոլար, որի մեծ մասը՝ 100 մլն 386 882 դոլարը «Հայաստան» համահայկական հիմնադրամը փոխանցել է ՀՀ կառավարությանը՝ պետական բյուջեին օժանդակելու համար

Հիմնադրամից նշում են, որ փոխանցված գումարներն ուղղվելու են Արցախից տեղահանված քաղաքացիների խնդիրներին, ինչպես նաև առողջապահական, սոցիալական, ենթակառուցվածքների և այլ ոլորտների ֆինանսավորմանը։ Հիմնադրամը վկայակոչում է նաև ՀՀ կառավարության երկու որոշումները, որոնցով նախատեսված է Արցախի մի շարք շրջաններից տեղահանված բնակիչներին 300 հազար դրամ և 68 հազար դրամ միանվագ աջակցություն։

«Հայաստան» համահայկական հիմնադրամը պատերազմի ընթացքում հանգանակված գումարով դեռևս որևէ ծրագրի ֆինանսավորում չի սկսել։ Այս պահին քննարկման փուլում է գտնվում հրետակոծություններից տուժած 260 տների ու բազմաբնակարանային շենքերի վերականգնման ծրագիրը։

Ավելի վաղ «Փաստինֆո»-ի հետ զրույցում Լոս Անջելեսում բնակվող հայազգի լրագրող Արթուր Սահակյանը նշել էր, որ Սփյուռքում բնակվող հայերի շրջանում նոյեմբերի 9-ի փաստաթղթից հետո տոտալ անվստահություն կա հիմնադրամի նկատմամբ։ Լրագրողի խոսքով ԱՄՆ-ում շատերն անգամ շարժում էին սկսել, որպեսզի հնարավորության դեպքում կարողանան հետ վերադարձնել այդ օրերին հիմնադրամին փոխանցած գումարը և ուղիղ օգնություն ցուցաբերեն դրանց կարիքն ունեցող մարդկանց․ «Շատերը եթե կրեդիտ քարտից են մուծել այդ գումարները, բողոքարկում են։ Բանկերին են դիմում, վիճարկում փոխանցումները և հետ ստանում»,-նշել էր լրագրողը։

Հիմնադրամից հետաքրքրվել էինք՝ արդյոք նոյեմբերի 10-ից հետո եղել են դեպքեր, երբ քաղաքացիները բանկային համակարգի միջոցով վիճարկել են իրենց փոխանցումներն ու հետ ստացել գումարը, որին ի պատասխան հիմնադրամից ըստ էության չհերքեցին՝ նշելով, որ այդ պրոցեսը միշտ որոշակիորեն առկա է․ «Երբեմն պատահում է, որ մարդիկ անզգուշությամբ կամ համակարգի թերացման, ինտերնետի արագության պատճառներով սխալ, կրկնակի կամ բազմակի փոխանցումներ են կատարել։ Սխալմունքով փոխանցումները ճշտվում են»,-հայտնում են հիմնադրամից։

Աղբյուր` Փաստինֆո