Փաստ ինֆո

ՀՀ ԱԳ նախարար Արա Այվազյանն Ազգային ժողովում էր: Նա աշխատանքային հանդիպում է ունենեցել ԱԺ արտաքին հարաբերությունների հանձնաժողովի անդամների հետ։

Հանձնաժողովի նախագահ Ռուբեն Ռուբինյանը նշեց, որ նախարարը ԱԺ-ում հյուրընկալվել է մոսկովյան եռակողմ հանդիպումից օրեր անց, որի արդյունքներով ստորագրվել է հայտարարություն, որի կենտրոնական կետը տարածաշրջանային կոմունիկացիաների ապաշրջափակումն է:

«Ռազմագերիների և այլ պահվող անձանց հարցով, ինչպես հայտնի է, դեռ էական առաջընթաց, այս պահի դրությամբ չկա և մեր այսօրվա հանդիպման նպատակն է նախ՝ արտգործնախարարի և արտգործնախարարության մեր գործընկերների  հետ վերլուծել  եռակողմ հանդիպման և ստորագրված հայտարարության արդյունքները, ապա քննարկել  բնականաբար մեր ռազմագերիների վերադարձի ուղղությամբ տարվող հնարավոր քայլերը»,- ասաց Ռուբեն Ռուբինյանը։ 

ԱԳ նախարար Արա Այվազյանն էլ իր հերթին կարևորեց կանոնավոր շփումները հանձնաժողովի հետ։ Նախարարն անդրադարձավ երեկ՝ Ադրբեջանի կողմից հրադադարի խախտման հերթական դեպքին։ Այվազյանի խոսքով՝ Ադրբեջանը խախտում է եռակողմ հայտարարության 1-ին և 8-րդ կետերը, որոնց համաձայն՝ կողմերը պետք է մնան իրենց զբաղեցրած դիրքերում, ամբողջովին դադարեցնեն կրակը և վերադարձնեն ռազմագերիներին ու ձերբակալված անձանց:

«Որոշ դեպքերում այդ խախտումները եղել են փոխկապակցված, ինչպես, օրինակ՝ Հադրութի շրջանի Խծաբերդ և Հին Թաղեր գյուղերի ուղղությամբ ադրբեջանական զինված ուժերի հարձակումը, որի հետևանքով գերեվարվեց 64 զինծառայող: Հայ զինծառայողների հանդեպ շինծու մեղադրանքների առաջադրումը, քրեական գործերի հարուցումը ոչ միայն խախտում են եռակողմ հայտարարությունը, այլև Ժնևյան կոնվենցիաները:
Այս գործողությունները չեն նպաստում տարածաշրջանում վստահության ձևավորման ջանքերին, քանի որ վստահության առաջացման ամենակարևոր գրավականը ստանձնած պարտավորությունների իրականացումն է, այլ ոչ թե պատանդառությունը և հայատյացության քաղաքականության շարունակումը»։

Նա նշեց, որ ղարաբաղյան հակամարտության հիմքում ընկած է Արցախի ժողովրդի ինքնորոշման իրավունքը, և Հայաստանը շարունակելու է հանդես գալ Արցախի ժողովրդի ինքնորոշման իրավունքի դիրքերից: «Հայաստանը պատրաստ է ԵԱՀԿ ՄԽ համանախագահների և նրանց երկրների հովանու ներքո շարունակել ԼՂ հակամարտության խաղաղ կարգավորման գործընթացը՝ հիմնված հիմնարար սկզբունքների և տարրերի այն հատվածի վրա, որը չի հասցեագրվել նոյեմբերի 9-ի հայտարարությամբ»,- ասաց Այվազյանը:

Նախարարի խոսքով՝ հայկական կողմերի առաջնահերթություններից է նաև Արցախի տարածքների դեօկուպացիան և այդ տարածքներից տեղահանված արցախահայության՝ իրենց բնակության վայրեր անվտանգ վերադարձի համար համապատասխան պայմանների ապահովումը: 

ԱԳ նախարարը նաև վստահեցրեց՝ ՀՀ-ն ամենաբարձր մակարդակով զբաղվում է  ռազմագերիների վերադարձման խնդիրներով, ինչի մասին ՀՀ վարչապետը հայտարարել էր հունվարի 11-ի եռակողմ հանդիպման ընթացքում:

«Հայաստանը, մաս կազմելով հունվարի 11-ի եռակողմ հայտարարությանը, հստակ մատնանշեց, որ պատրաստ է քայլեր ձեռնարկել մեր տարածաշրջանի տնտեսական և ենթակառուցվածքային պոտենցիալի փոխշահավետ օգտագործման ուղղությամբ: Սակայն հաջողության հասնելու համար մեզ անհրաժեշտ է փոխադարձ վստահություն»,- ասաց Արա Այվազյանը։

Անդրադառնալով հայկական պատմամշակութային ժառանգության պահպանմանը՝ Այվազյանը նշել է, որ մինչ այժմ այդ ուղղությամբ միջազգային հանրության ցանկացած քայլ հանդիպում է Ադրբեջանի դիմադրությանը, որը թույլ չի տալիս միջազգային կառույցներին, մասնավորապես՝ ՅՈՒՆԵՍԿՕ-ին, մուտք գործել տարածաշրջան: 

«Հայ ժողովրդի պատմության և արժեքների յուրացումը կամ խեղաթյուրումը, հայ ժողովրդի ներկա իրավունքների ոտնահարումը չեն կարող ստեղծել լավ ապագա մեր տարածաշրջանի համար: Այս տեսանկյունից մշակութային ժառանգության, կրոնական սրբավայրերի պահպանությունը կարող է ստեղծել նախադրյալներ տարածաշրջանում հաշտության համար»,- ասաց նա:

Նախարարի խոսքից հետո հանձնաժողովի անդամների հետ սկսվեց փակ հանդիպում, որպեսզի դետալային և անկաշկանդ քննարկեն, թե խորհրդարանական դիվանագիտությունն ինչ կարող է անել գերիների վերադարձի ուղղությամբ:

Աղբյուր` Փաստինֆո