Փաստ ինֆո

Գործադիրն այսօրվա նիստում հավանություն տվեց «Դատական օրենսգիրք» սահմանադրական օրենքում փոփոխություններ և լրացումներ կատարելու մասին նախագծերի փաթեթին, որով կներդրվի երկու ենթամասնագիտացում, մասնավորապես մինչդատական վարույթների նկատմամբ դատական վերահսկողություն իրականացնող մասնագիտացված դատավորների ինստիտուտը և կոռուպցիոն հանցագործությունների քննությունն իրականացնող դատավորների ինստիտուտը։

ՀՀ արդարադատության նախարար Ռուստամ Բադասյանը նշեց, որ դատական իշխանության վիճակագրական տվյալները փաստում են՝ քրեական մասնագիտացման դատավորները քննում են նաև այնպիսի գործեր, որոնք վերաբերում են մինչդատական վարույթի նկատմամբ դատական վերահսկողությանը, այդ թվում կալանքի միջնորդություններ, խուզարկության թույլտվության միջնորդություններ․ «Կարծում ենք, որ մինչդատական վարույթի նկատմամբ դատական վերահսկողություն իրականացնող մասնագիտացումն անհրաժեշտություն է նմանատիպ միջնորդությունների քննության արդյունավետությունը բարձրացնելու տեսանկյունից։ Մեր հակակոռուպցիոն ռազմավարությունից էլ բխում է, որ պետք է կոռուպցիոն հանցագործությունների քննության մասով ևս ներդրվի մասնագիտացում»,-նշեց նախարարը։

Ռուստամ Բադասյանի խոսքով 2019թ․-ի հուլիսի 1-ից 2020թ․-ի հուլիսի 1-ի դրությամբ դատարանում քննվում են 275 կոռուպցիոն հանցագործությունների հետ կապված քրեական գործեր, իսկ Դատախազությունը շուրջ 2228 քրեական գործի մինչդատական վարույթի օրինականության նկատմամբ իրականացնում է դատախազական հսկողություն․ «Այս թվերից կարելի է եզրահանգել, որ կոռուպցիոն հանցագործությունների քննության ծավալը դատական համակարգում մոտավորապես 30 տոկոս աճի միտում ունի և մասնագիտացման անհրաժեշտությունը նաև այս թվերից է բխում»,-նշեց Ռուստամ Բադասյանը։

Աղբյուր` Փաստինֆո