Փաստ ինֆո

Արտաքին քաղաքականության մեջ Նիկոլ Փաշինյանը բացարձակ որևէ կշիռ չունի։ Նա ոչ թե փորձում է սպասարկել Հայաստանի շահերը, այլ փորձում է բնակչության մոտ արդարանալ։ Նրա հայտարարությունները ևս ներքին լսարանում արդարացումներ գտնելու համար են։ «Փաստինֆո»-ի հետ զրույցում այս մասին ասաց քաղաքագետ Ստեփան Դանիելյանը։

Անդրադառնալով Մինսկի խմբի համանախագահ Իգոր Պոպովի՝ Նիկոլ Փաշինյանի հոդվածի անդրադարձին, քաղաքագետը նկատեց՝ պարզ չէ, թե ռուսական առաջարկներն ինչին են վերաբերվել, քանի որ դրանց մեծ մասը փակ քննարկումների առարկա են, բայց Պոպովի հայտարարությունից կարելի է ենթադրել, որ Ռուսաստանի խնդիրը 5 շրջանների վերադարձի միջոցով կոմունիկացիոն ուղիները բացելը և Արցախում ռուսական զորք տեղակայելն էր․ «Ուղղակի այդ երկու շրջանները՝ Քարվաճառն ու Լաչինը մնում էին Հայաստանի վերահսկողության տակ և այդ ամենն առանց զոհերի կլիներ։ Սա է եղել առաջարկը։ Այնինչ Նիկոլ Փաշինյանն ասում է, որ 7 շրջանի պահանջ է դրվել, այդպես չէ։ Նիկոլ Փաշինյանը թող այն հարցին պատասխանի, թե ինչու հոկտեմբերի 19-ին, երբ իրեն առաջարկվել էր պատերազմը կանգնեցնել, ինքն այդ առաջարկի մասին Անվտանգության խորհրդի անդամներին տեղյակ չէր պահել։ Այդ հարցի պատասխանն ամբողջ կյանքում իրեն հետապնդելու է և երբ իշխանությունը կորցնի, պետք է ցուցմունքներ տա դրա հետ կապված։ Լավ կլինի նա այդ հարցին պատասխանի, այլ ոչ թե որպես հայտնի դեմագոգ և պոպուլիստ փորձի ինքնարդարացման տարբերակներ որոնել»,-նշեց քաղաքագետը։

Հարցին՝ արդյոք վարչապետի այդ հայտարարությունը, որը կարճ ժամանակահատվածում ռուսական կողմը հերքեց, էլ ավելի չի վատացնի հայ-ռուսական հարաբերությունները, Ստեփան Դանիելյանը նկատեց՝ մենք Ռուսաստանի հետ որևէ հարաբերություն չունենք։ Նրա խոսքով մենք ունենք մի կառավարություն, որին ոչ ոք լուրջ չի վերաբերվում և որն անում է այն, ինչ իրեն հրահանգում են․ «Նիկոլ Փաշինյանը Հայաստանի կարգավիճակն իջեցրել է օբյեկտի կամ տարածքի կարգավիճակի։ Այս վիճակում իր հայտարարությունները որևէ այլ իմաստ չունեն։ Նա ընդամենը դիմում է Հայաստանի բնակչությանը՝ ապակողմնորոշելու համար, իսկ հայ-ռուսական հարաբերություններ չկան։ Կա Ռուսաստան և կա օբյեկտ, որը ղեկավարում է Նիկոլ Փաշինյան անունով մեկ այլ օբյեկտ»։

Ստեփան Դանիելյանի կարծիքով Նիկոլ Փաշինյանը ոչ թե պարտված ղեկավար է, այլ պետությունը տապալած ղեկավար և այս պարագայում ճիշտ չէ նրա հետ խոսել սահմանադրական նորմերով, իշխանափոխություն իրականացնելու լեզվամտածողությամբ․ «Այստեղ ավելի ռադիկալ քայլեր են պետք և կարծում եմ՝ ցանկացած ռադիկալ քայլ այս իրավիճակում արդարացված է։ Երբ սահմանադրությամբ չնախատեսված իրավիճակ է լինում, որոնում են սահմանադրությամբ չնախատեսված լուծումներ։

Աղբյուր` Փաստինֆո