Փաստ ինֆո

Արամ Սարգսյանը կառավարություն էր եկել վարչապետի հրավերով։ Լրագրողների հետ զրույցում Արամ Սարգսյանն ասաց, որ քննարկել են  տնտեսական բնույթի հարցեր, ինչպես նաև խոսել են գերիների հետ կապված խնդիրների մասին։

Նրա խոսքով՝ որոշակի քաղաքական հանդիպումներ է ունեցել։ Հիմանկանում աշխատանքները հումանիտար ուղղություններով են ընթացել։

«Ամենաէականը տնտեսական խնդիրներն էին։ Խոսքը վերաբերում է մասնավորապես՝ Հայաստանի տնտեսության զարգացման և այս իրավիճակից տնտեսությունը տեղից պոկելու, ինչպես նաև երկաթգծի հետ կապված խնդիրներին։ Նախկինում այդ երկաթգծով մենք աշխատել ենք և Իրանի հետ, և Թուրքիայի հետ»,- ասաց Սարգսյանը։

Ինչ վերաբերում է եռակողմ հանդիպմանը, վերջինս նշեց, որ աշխարհում չկա ժողովուրդ, որը ցանկանում է շրջափակված ապրել և որևէ մեկը մեզ չի հասկանա, եթե մենք ասենք, որ ուզում ենք փակ ապրել, որովհետև այդպես ավելի անվտանգ է։

Նրա խոսքով՝ ցանկացած ապաշրջափակման պետք է համաձայնենք, բայց պետք է նրբություններին ուշադրություն դարձնել։ Նա նշեց, որ կա հոգեբանական, ազգային խնդիր։  Ադրբեջանն էլ այդտեղից չի հեռանալու, պետք է փորձել իրավիճակները հարթել, իրավիճակներին ճիշտ լուծումներ տալ, իսկ այդտեղ մեզ համար շահեկան կլինի, եթե ուժեղ պետություն, տնտեսություն ունենանք, կարողանանք զինել մեր բանակը, որովհետև Ադրբեջանը մեզ երբեք չէր հաղթի, եթե իրեն չօգներ Թուրքիան, եթե գերժամանակակից զենքեր չգներ, հետևաբար՝ մենք էլ պետք է օգտվենք հնարավորություններից, մեր զինվորի խիզախությունն էլ հետը՝ նորից սկսենք հաշվի նստել։

«Հայը, որը կասի, որ մենք դրա հնարավորությունը չունենք, լավ հայ չի։ Կարծում եմ՝ ունենք, պետք է աշխատել այդ ուղղությամբ, պետք է յուրաքանչյուրս մեր ասելիքները, առաջարկություններն անենք՝ անկախ նրանից, թե ինչ վերաբերմունք ունենք գործող իշխանության, ոլորտի պատասխանատուի առումով»,- նշեց Սարգսյանը։

Ինչ վերաբերում է Մոսկվա այցի ընթացքում Փաշինյանի օրակարգի տապալմանը, Սարգսյանը նշեց, որ Մոսկվայում տապալվել է նաև Ադրբեջանի օրակարգը, երբ Ալիևը հայտարարում է, որ Ղարաբաղի հարց այլևս չկա և հղում է անում ՌԴ նախագահին։

«Այդ հանդիպումը եռակողմ էր, չէր մասնակցում Թուրքիան, իսկ դա Թուրքիայի համար էլ լուրջ հարված է։ Թուրքիան մտածում է՝ Ադրբեջանը թռնում է իր գլխից, ինքնուրույն քայլեր է անում»,- նշեց նա։

Աղբյուր` Փաստինֆո