Փաստ ինֆո

ՊՆ վարչական տարածք ավտոմեքենայով մուտք գործած անհետ կորած զինվորի հորը՝ Գ. Վարդանյանին, մեղադրանք դեռևս չի առաջադրվել, խափանման միջոցի հարցը չի լուծվել։ Այս մասին «Փաստինֆո»-ի հետ զրույցում ասաց պաշտպան Կարեն Ստեփանյանը։

Հիշեցնենք, որ նոյեմբերի 10-ից հետո անհետ կորած զինվորների հարազատները ակցիաներ են իրականացնում՝ պահանջելով տեղեկատվություն իրենց զավակների մասին։ Արդեն 100 օր է, ինչ շատերը լուր չունեն, թե որտեղ են իրենց որդիները՝ ողջ են, թե մեռած, գերի են, թե վիրավոր։ Դեպքի օրը՝ հունվարի 10-ին, անհետ կորած զինվորների ծնողները հերթական անգամ ակցիաներ են իրականացրել ՊՆ շենքի մոտ, որի ընթացքում նրանցից մեկը՝ Գ. Վարդանյանը, «ՎԱԶ 2107» մակնիշի ավտոմեքենայով հարվածել է ՀՀ ՊՆ վարչական համալիրի հսկիչ անցագրային կետի դարպասին, կոտրել դրանք և մուտք գործել ՊՆ վարչական համալիրի տարածք: Ըստ պաշտոնական վարկածի՝ նա մեքենայով կոտրել է նաեւ վարչական մասնաշենքի մուտքի դռները և մեքենայով մխրճվել շինության մեջ։ Հարուցվել է քրեական գործ՝ ՀՀ ՔԿ ԶՔԳՎ 4-րդ կայազորային քննչական բաժնում՝ ՀՀ քրեական օրենսգրքի 327.6 հոդվածի 5-րդ մասով՝ ռազմական դրության կամ պատերազմի պարագայում Զորամաս կամ հատուկ պահպանվող զինվորական այլ տարածք ապօրինի մուտք գործելու և 258 հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն կատարելու հատկանիշներով, որի շրջանակներում զինվորի հայրը ձերբակալվել է։

Արձանագրենք, որ հոդվածները բավականին ծանր են. ՀՀ քրեական օրենսգրքի 258-րդ հոդվածի 4-րդ մասը որպես պատիժ սահմանում է ազատազրկումը՝ չորսից յոթ տարի ժամկետով, իսկ նույն օրենսգրքի 327.6-րդ հոդվածի 5-րդ մասով նախատեսված արարքը՝ ազատազրկմամբ՝ հինգից տասը տարի ժամկետով:

Վարդանյանին ձերբակալելու մասին որոշման դեմ բողոք չի ներկայացվել, իսկ ձերբակալման 72 ժամն արդեն լրանում է, հետեւապես կալանավորման որոշում չլինելու դեպքում նա այսօր պետք է ազատ արձակվի արգելանքից։
Ինչ վերաբերում է Վարդանյանի մասնակցությամբ իրականացվող քննչական գործողություններին, պաշտպանը տեղեկացրեց, որ Վարդանյանը կարճ ցուցմունք է տվել՝ որպես կասկածյալ և հայտնել իր հոգեվիճակը, ներկայացրել նախորդող ժամանակահատվածում իր հետ տեղի ունեցած դեպքերը։

Զինվորի հայրը օրեր շարունակ շրջել է դիահերձարաններով, նրան պարբերաբար ճանաչման են ներկայացրել տարբեր դիակներ, ոսկորներ, սակայն որդուն չի գտել, չի ճանաչել։ Ցուցմունքում հենց այս իրավիճակն է ներկայացրել այսօր կասկածյալի կարգավիճակում գտնվող զինվորի հայրը։

Հանցակազմի վերաբերյալ պաշտպանը ձեռնպահ մնաց գնահատականներ տալ՝ մինչև մեղադրանքի առաջադրումը, սակայն գտնում է, որ հոգեբանական իրավիճակը պետք էր հաշվի առնել։
«Կարծում եմ՝ քննչականն էլ, իրավապահ մյուս մարմիններն էլ իրենց մտահոգություններն ունեն։ Իրավական գործընթաց է, որն այս պահին դեռևս իր հունով է ընթանում։ Ճիշտ է՝ միայն ձերբակալվել է, պաշտպան է ներգրավվել և կարճ ցուցմունք է տվել՝ որպես կասկածյալ, բայց առջևում դեռևս կա նախաքննություն, ամեն բան իր տեղը կընկնի»,- նշեց պաշտպանը՝ հավելելով, որ չգիտի, թե ինչ մեղադրանք կառաջադրվի։

Ստեփանյանն արձանագրեց, որ իր պաշտպանյալի նկատմամբ իրավապահ մարմինների ներկայացուցիչների վերաբերմունքից վատ տպավորություն չի ստացել, այսինքն, նրան չեն նայում հանցագործի աչքերով, թեև ունենք օրենք, առկա են գործողություններ, որոնք կարող են ներառվել ՀՀ քրեական օրենսգրքի որոշակի հոդվածներով։

«Նրան ոչ ոք հանցագործի աչքերով չի նայում, բայց կարեկցանք ասվածը քիչ է, նա ասելիք ունի և դա ոչ թե բանավոր, այլ՝ իրավական ձևակերպումներով կտրվի հաղորդում։ Այսինքն՝ այն մտավախություններն, ինչ որ ունի ինքը, ամբողջությամբ կտրվի թղթին և իրավական դաշտ կտեղափոխվի»,- նշեց պաշտպանը՝ այլ մանրամասներ չներկայացնելով։

Հեղինակ՝ Իզաբել Սահակյան

Աղբյուր` Փաստինֆո