Փաստ ինֆո

Նախագահի «Չորրորդ հանրապետության» միտքը ալեգորիայի ոլորտում է, խնդիրը հանրապետության թվարկումը չէ, խնդիրն այն է, որ մեր 25 տարվա պատմությունը ցույց է տալիս, որ մենք Արցախյան առաջին պատերազմից հետո համապատասխան ենթադրություններ չենք արել, ինչը բերել է Արցախյան երկրորդ պատերազմում պարտության: Մենք թե՛ ռազմական, թե՛ բարոյահոգեբանական, թե՛ ռազմատեխնիկական առումով պատրաստ չէինք այս պատերազմին: «Փաստինֆո»-ի հետ զրույցում նման տեսակետ է հայտնել քաղաքագետ Ստեփան Դանիելյանը՝ վերլուծելով նախագահ Արմեն Սարգսյանի «Դեպի «Չորրորդ Հանրապետություն»» խորագրով հոդվածը:

Քաղաքագետի դիտարկմամբ՝ պետք է փորձենք նոր հանրապետություն ստեղծել՝ թե ինչպես կկոչվի այդ հանրապետությունը՝ էական չէ.
«Մենք պետք է նստենք և վերլուծենք այս պարտությունը, հետևություններ անենք և այդ հետևությունների հիման վրա նոր հարաբերություններ ձևավորենք՝ սկսած պետական ինստիտուտներից, վերջացրած՝ միջմարդկային հարաբերություններից»,-ասաց Ստեփան Դանիելյանը:

Քաղաքագետ արձանագրում է, որ մեր ինքնիշխանության աստիճանը բավականին իջել է, բայց չի նշանակում, որ ինքնիշխանություն չունենք.

«Նիկոլ Փաշինյանը տապալել է ամեն ինչ, Նիկոլ Փաշինյանը և «Իմ քայլը» քաղաքական որևէ ապագա չունեն, այլ հարց է՝ իրենից հետո ինչ պետք է մենք անենք: Շատերն ընդհանուր պայմանավորվածության են եկել Վազգեն Մանուկյանի թեկնածության շուրջ, նա շատ մեծ դեր է ունեցել Հայաստանի պատմության վերջին 30 տարում, վերջինս լավ թեկնածու է ժամանակավոր նոր կառավարություն ձևավորելու համար»,-ասաց քաղաքագետը՝ ավելացնելով, որ պետք է փորձել time-out վերցնել, որպեսզի քաղաքական դաշտը կայունանա, քանի որ այն տապալված է, այդ մեկ տարվա ընթացքում քննարկումներ պետք է լինեն՝ ինչ փոփոխություններ պետք է անենք, ինչպես ենք տեսնում մեր ապագան.

«Միանշանակ է, որ Նիկոլ Փաշինյանը չի կարող շարունակել իր վարչապետությանը, սա վերաբերվում է նաև ԱԺ մեծամասնությանը: Քաղաքական իրավիճակն այնպիսինն է, որ հիմա չենք կարող նոր ընտրություններ անցկացնել, պետք է այս խորհրդարանը ժամանակավոր մնա՝ մինչև նոր ընտրություններ լինեն: Եթե փորձեն արտահերթ ընտրություններն հիմա անցկացնել այդտեղ ոչ մի լավ բան չեմ տեսնում, նոր ցնցումներ կլինեն»,-նկատում է քաղաքագետը:

Ստեփան Դանիելյանը նաև կարծում է, որ այսօր «Իմ քայլի» հետ քաղաքական երկխոսությունների գնացող չկա, քանի որ նրանց հետ խոսելն անիմաստ է.

««Իմ քայլում» քաղաքական մտածողություն ունեցող անձիք չկան, իսկ ինչ վերաբերվում է վարչապետին, նա խոսքի արժեք չի հասկանում և պետական մտածողություն չունի, այդ մարդու հետ ինչ-որ բան պայմանավորվելն անիմաստ է»,-մեզ հետ զրույցում նշեց քաղաքագետը:

Աղբյուր` Փաստինֆո