Փաստ ինֆո

Պատերազմում անհետ կորած որդուց շուրջ 100 օր լուր չունեցող ծնողին սպառնում է ազատազրկում՝ 5-ից 10 տարի ժամկետով։ Նրան վերագրում են ռազմական դրության ժամանակ կառավարման կարգի դեմ ուղղված հանցագործության կատարում։

Հիշեցնենք, որ նոյեմբերի 10-ից հետո անհետ կորած զինվորների հարազատները ակցիաներ են իրականացնում՝ պահանջելով տեղեկատվություն իրենց զավակների մասին։ Արդեն 100 օր է, ինչ շատերը լուր չունեն, թե որտեղ են իրենց որդիները՝ ողջ են, թե մեռած, գերի են, թե վիրավոր։ Դեպքի օրը՝ հունվարի 10-ին, անհետ կորած զինվորների ծնողները հերթական անգամ ակցիաներ են իրականացրել ՊՆ շենքի մոտ, որի ընթացքում նրանցից մեկը՝ Գ. Վ.-ն, «ՎԱԶ 2107» մակնիշի ավտոմեքենայով հարվածել է ՀՀ ՊՆ վարչական համալիրի հսկիչ անցագրային կետի դարպասին, կոտրել դրանք և մուտք գործել ՊՆ վարչական համալիրի տարածք: Ըստ պաշտոնական վարկածը՝ Գ.Վ.-ն մեքենայով կոտրել է նաեւ վարչական մասնաշենքի մուտքի դռները և մեքենայով մխրճվել շինության մեջ։

ՔԿ-ից «Փաստինֆո»-ին հայտնեցին, որ հարուցվել է քրեական գործ՝ ՀՀ ՔԿ ԶՔԳՎ 4-րդ կայազորային քննչական բաժնում՝ ՀՀ քրեական օրենսգրքի 327.6 հոդվածի 5-րդ մասով՝ ռազմական դրության կամ պատերազմի պարագայում Զորամաս կամ հատուկ պահպանվող զինվորական այլ տարածք ապօրինի մուտք գործելու և 258 հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն կատարելու հատկանիշներով։ Նշենք, որ ՀՀ քրեական օրենսգրքի 258-րդ հոդվածի 4-րդ մասը որպես պատիժ սահմանում է ազատազրկումը՝ չորսից յոթ տարի ժամկետով, իսկ նույն օրենսգրքի 327.6-րդ հոդվածի 5-րդ մասով նախատեսված արարքը՝ ազատազրկմամբ՝ հինգից տասը տարի ժամկետով:

Աղբյուր` Փաստինֆո