Փաստ ինֆո

Բոլոր տեղեկություններին վարչապետը տիրապետում էր, ինչու՞ չի դադարեցվել պատերազմը հարցի պատասխանը պետք է Փաշինյանից ստանաք, - «Փաստինֆո»-ի հետ զրույցում ասաց «Բարգավաճ Հայաստան» խմբակցության քարտուղար Արմեն Աբովյանը.

Հիշեցնենք, որ 5-րդ ալիքին տված հարցազրույցի ժամանակ ԱԱԾ նախկին ղեկավար Միքայել Համբարձումյանը մի քանի ուշագրավ հայտարարություններ է արել: Նա մասնավորապես ասել է, որ հոկտեմբերի 19-ի անվտանգության խորհրդի նիստի ժամանակ ԳՇ պետ Օնիկ Գասպարյանը մանրամասն ներկայացրել է առաջնագծում տիրող իրավիճակը, զգուշացրել, որ մենք գնում ենք պարտության, առաջարկել է դադարեցնել պատերազմը, նույն կարծիքին է եղել նաև ՊՆ նախարար Դավիթ Տոնոյանը, այդ նիստին ներկա են եղել ԱԺ ընդդիմադիր պատգամավորներ Արման Աբովյանը և ԼՀԿ ղեկավար Մարուքյանը: Չնայած բոլոր այս նախազգուշացումներին՝ պատերազմն այդպես էլ չի դադարեցվել:

ԱԱԾ նախկին ղեկավարը հարցազրույցի ժամանակ նաև հայտարարել է, որ Անվտանգության խորհրդի նիստին չեն ներկայացվել Ռուսաստանի առաջարկները՝ պատերազմը դադարեցնելու վերաբերյալ՝«Ես նոյեմբերի ութին հրաժարական եմ տվել, նոյեմբերի 7-ի դրությամբ չեմ իմացել այդ մասին»,-հարցազրույցի ժամանակ ասել է Միքայել Համբարձումյանը.

«Փաստինֆո»-ն փորձեց պարզել ԲՀԿ պատգամավոր Արման Աբովյանից՝ արդյո՞ք ընդդիմադիր խմբակցությունը փորձել է այդ օրերին պարզաբանում ստանալ երկրի վարչապետից, թե ինչու՞ չի դադարեցվում պատերազմը. «Բոլոր տեղեկություններին վարչապետը տիրապետում էր թե՛ անվտանգության խորհրդից առաջ, թե՛ անվտանգության խորհրդից հետո, իսկ ինչու՞ չի դադարեցրել պատերազմը՝ չեմ հետաքրքրվել:Նիստի ժամանակ ներկայացվել է, որ առաջնագծում վիճակը ծանր է, ինչի մասին արդեն խոսել ենք, մյուս բոլոր գործողությունների տրամաբանությունը ճիշտ կլինի հարցնեք Փաշինյանից»,-ասաց պատգամավորը՝ նկատելով, որ ըստ Ռուսաստանի նախագահի հայտարարությունների պատերազմի ժամանակ մի քանի անգամ Նիկոլ Փաշինյանին առաջարկել է՝ ինչպես կարելի է շատ շուտ դադարեցնել պատերազմը, սակայն իրենց հետ այդ հարցը չի քննարկվել։

«Անվտանգության խորհրդի նիստի ժամանակ Փաշինյանն ասել է, որ ինքը մշտական կապի մեջ է Ռուսաստանի նախագահի հետ, չեմ հիշում այդպիսի դրվագ, որ հստակ ասի՝ Ռուսաստանն առաջարկել է դադարեցնել պատերազմը, դրա մասին լսել եմ Ռուսաստանի նախագահի հարցազրույցից: Ինչու՞ պատերազմը չի դադարեցվել՝ այս հարցի պատասխանը պետք է Փաշինյանից ստանաք, քանի որ նիստի ժամանակ հիմնականում քննարկվել է տիրող իրավիճակը և ելքերը, մեզ պարզապես տեղեկացվել է իրավիճակի մասին, բացի դա հիշեցնեմ, որ ոչ՛ ես, ոչ՛ պարոն Մարուքյանը չենք հանդիսանում անվտանգության խորհրդի մշտական անդամ, մենք ընդամենը հրավիրվածներ էինք»,-ասաց ԲՀԿ պատգամավոր Արման Աբովյանը:

Աղբյուր` Փաստինֆո