Փաստ ինֆո

ԱԱԾ տնօրենի նախկին ժամանակավոր պաշտոնակատար, գնդապետ Միքայել Համբարձումյանը ծանոթ չի եղել սեպտեմբերի 30-ին ԳՇ պետի այն հայտարարությանը, թե այլևս ռեսուրս չունենք պատերազմելու համար, քանի որ ինքը անվտանգության խորհրդի նիստին չի մասնակցել։ 

«Դե յուրե պաշտոնակատար չեմ եղել ու հայտարարությանն անձամբ չեմ ծանոթացել»,- այս մասին ասել է ԱԱԾ տնօրենի նախկին պաշտոնակատար Միքայել Համբարձումյանը՝ «5-րդ ալիք» հեռուստաընկերության «Հարցազրույց» հաղորդաշարի եթերում նշելով, որ ամենօրյա, ամենժամյա ռեժիմով վարչապետին զեկուցում էր իրավիճակի ու հեռանկարների մասին։

«Եթե չեմ սխալվում, ևս մեկ նիստ տեղի ունեցավ հոկտեմբերի 18-ին կամ 19-ին, որի ժամանակ Օնիկ Գասպարյանը շատ մանրամասն ներկայացրեց տիրող իրավիճակը, հեռանկարը, և այն, որ ուղղակի մենք գնում ենք դեպի պարտություն, առաջարկություն կար՝ դադարեցնելու պատերազմական գործողությունները, նույն կարծիքին էր նաև Դավիթ Տոնոյանը, եթե հիշողությունս չի դավաճանում», - ասաց Համբարձումյանը՝ հավելելով, որ ներկա էին նաև ընդդիմադիր կուսակցությունների ներկայացուցիչները, սակայն, նման որոշում չկայացվեց, թե ինչու՝ չի կարող ասել։ Հենց այդ «ինչու»-ի պատասխանը չունենալն էր իրեն անհանգստացնում։

Միքայել Համբարձումյանը հավելեց, որ Անվտանգության խորհրդի նիստի ժամանակ տեղյակ չի եղել ՌԴ նախագահ Վլադիմիր Պուտինի՝ պատերազմը կանգնեցնելու առաջարկի մասին։

«Նոյեմբերի 7-ի դրությամբ, ես չեմ իմացել այդ մասին, իսկ նոյեմբերի 8-ին հրաժարական եմ տվել», - ասաց Համբարձումյանն ու նշեց, որ դրա մասին ինքը տեղեկացել է ոչ թե վարչապետից, այլ գործընկերներից։

Համբարձումյանը հիշեցրեց՝ դեռևս հոկտեմբերի 19-ին կամ 20-ին առաջարկություն է եղել ՌԴ-ի կողմից ՝ կոնկրետ ու կետային, թե ինչ պետք է անել։

«Ըստ էության կյանքի էր կոչվելու Լավրովի պլանը»,-ասաց Համբարձումյանն ու հավելեց, որ սա էր պատերազմը կանգնեցնելու, մարդկային ու տարածքային քիչ կորուստների հնարավորությունը, որից չօգտվեցին։

Աղբյուր` Փաստինֆո