Փաստ ինֆո

Վարչապետի վերջին դիրքորոշումը՝ պաշտոնից կառչած մնալը բավականին խոսուն ու անընդունելի փաստ է,- «5-րդ ալիքի» եթերում հայտարարել է ԱԱԾ նախկին տնօրեն Միքայել Համբարձումյանը՝ նշելով, որ Նիկոլ Փաշինյանի իշխանության գալու ժամանակ կիսել է նրա գաղափարական շատ մոտեցումներ՝ կոռուպցիայի դեմ պայքարի, ընտրությունների արդար ու թափանցիկ լինելու մասին, մինչդեռ հիմա Փաշինյանն է կառչած մնում աթոռից։

Համբարձումյանը կարծում է, որ վարչապետը ոչ թե հիմա՝ «ճնշումների» ազդեցության տակ պետք է որոշեր, որ պետք է գնան արտահերթ ընտրություններին, այլ այդ որոշումը պետք է շատ ավելի վաղ կայացներ։

«Նույնիսկ նոյեմբերի 10-ից հետո պետք է հայտարարեր, որ երկիրը կանգնել է գլոբալ խնդիրների առջև և նշանակվելու են ատահերթ ընտրություններ։ Նույնիսկ դրա մասին չէր մտածում։ Այս միտքն առաջացավ հանրային ճնշման ներքո, ինչը անընդունելի է ինձ համար։ Այսօր չեմ ընդունում իր այն մոտեցումը, որ ինքը՝ առանց հրաժարական տալու պետք է կազմակերպի արտահերթ ընտրություններ։ Այդպես չպետք է լինի, մարդը չպետք է կառչած մնա իր աթոռին։ Մեր մոտ պետք է մշակույթ ձևավորվի, որ եթե մեր մոտ առաջացել են համազգային խնդիրներ, եթե տեղի են ունեցել համազգային բացթողումներ, ինքը՝ ղեկավարը պետք է նախաձեռնի հրաժարական ու արտահերթ ընտրությունները»,- ասաց Համբարձումյանը։

ԱԱԾ տնօրենի նախկին ժամանակավոր պաշտոնակատարն ընդունում է, որ 2018 թվականին տեղի է ունեցել իշխանազավթում՝ իշխանությունները ճնշման ներքո հրաժարական են տվել։ Իսկ հարցին՝ եղե՞լ է դեպք, որ Նիկոլ Փաշինյանի մոտ կանգնած մարդիկ փորձեն միջամտել իր աշխատանքներին, Համբարձումյանը կրկնեց, որ կառավարչական խնդիր կար վարչապետի մոտ։

«Դա պայմանավորված է նաև նրանով, որ, այո, Նիկոլ Փաշինյանի մոտ կանգնած մարդիկ մտածում էին, որ իրենք իրավասություն ունեն զանգեն, ԱԱԾ տնօրենի առջև խնդիր ձևակերպեն ու ակնկալեն, որ ԱԱԾ տնօրենը այդ խնդիրը կատարի ու իրենց էլ ներկայացնի արդյունքները»,-ասաց Համբարձումյանն ու հավելեց, որ նման մոտեցումն իր համար անընդունելի է ու չի կատարել այդ խնդիրները։

Հարցին՝ վարչապետի տիկինն արդյոք իրեն հրահանգներ տվե՞լ է, Համբարձումյանն ասաց, որ Նիկոլ Փաշինյանի կնոջ հետ երբեք ոչ մի հանգամանքում չի առնչվել։

Աղբյուր` Փաստինֆո