Փաստ ինֆո

Ես եղել եմ ռեյթինգային ցուցակում ամենավերջին համարը և եթե իրենք վստահ չլինեին, որ Սոֆյա Հովսեփյանը կունենա այն ձայները, որոնք կարող են անցողիկ լինել, ապա դժվար թե ուղղակիորեն ինձ տանեին ամենավերջին համար։ Այս մասին լրագրողների հետ զրույցի ժամանակ ասաց ԱԺ պատգամավոր Սոֆյա Հովսեփյանը։

Անդրադառնալով այն արտահայտությանը, որ եթե քվեաթերթիկում իր անվանից վերև գրված լիներ «Նիկոլի ուսապարկ», ապա այն ավելի շատ ձայն էր հավաքելու, քան իր անուն-ազգանունը, պատգամավորը նշեց, որ ինքն այդ արտահայտությունն իր վրա չի վերցնելու․

«Այն անձը, որը նման մոտեցում է ցուցաբերել, նշանակում է՝ այդ վերաբերմունքն ունի խմբակցության այն անդամների նկատմամբ, որոնք ընտրվել են։ Նաև վիրավորում են այն անձանց, որոնք ընտրություն են կատարել։ Սա շատ բան է խոսում քաղաքական թիմի նկատմամբ քաղաքական կուսակցության վերաբերմունքի մասին»,-նշեց Սոֆյա Հովսեփյանը։

Հարցին՝ ինչու՞ 2017թ․-ին չընտրվեց, եթե կարծում է՝ 2018թ․-ի ընտրություններին Նիկոլ Փաշինյանի գործոնը չի եղել, Սոֆյա Հովսեփյանն ասաց, որ 2017թ․-ի ընտրությունները կտրուկ տարբերվում են 2018թ․-ի ընտրություններից․

«Այն ժամանակահատվածում, երբ հավաքել եմ 10 անգամ ավելի քիչ ձայներ ու շատ քաղաքական գործիչներից, այդ թվում «Ելք» դաշինքի քաղաքական գործիչներից 2-3 անգամ ավելի այն դեպքում, որ երբեք քաղաքական գործունեության մեջ չեմ եղել, գնահատվել է լավագույն արդյունք։ Կարծում եմ՝ 2017թ․-ի իմ ձայներն արդեն իսկ խոսում է իմ վարկանիշի մասին»,-ասաց պատգամավորը։

Հարցին՝ խմբակցությունից դուրս գալու որոշումը քննարկե՞լ է Նիկոլ Փաշինյանի հետ, Սոֆյա Հովսեփյանն ասաց, որ չի հասցրել այդ հարցը որևէ մեկի հետ քննարկել։ Նա նշեց, որ ցանկանում էր այդ հարցը քննարկել խմբակցության ղեկավարի հետ, սակայն վերջինս այդ պահին նպատակահարմար չգտավ։

Աղբյուր` Փաստինֆո