Փաստ ինֆո

Հանդիպման արդյունքներից մեկ եզրակացության կարելի է անել, որ Փաշինյանը, ինչպես ենթադրվում էր, թե՛ երկրի ներսում, թե՛ առավել ևս երկրից դուրս չի կարող լինել լիիրավ բանակցող: Մոսկովյան բանակցությունների արդյունքները վերահաստատում են, որ բանակցողը պետք է փոխվի, պետք է լինի մարդ, որը պատերազմում կապիտուլյացիայի համար քաղաքական կամ անձնական որևէ պատասխանատվություն չունի և ավելի է ազատ է իր գործողություններում, կկարողանա նոր խնդիրներ դնել և նոր օրակարգ առաջարկել, բանակցելու ունակություն կունենա: «Փաստինֆո»-ի հետ զրույցում ասաց քաղտեխնոլոգ Վիգեն Հակոբյանը՝ անդրադառնալով այսօրվա մոսկովյան բանակցությունների արդյունքներին:

Նշենք, որ Մոսկվայում ավարտվել է Հայաստանի, Ռուսաստանի և Ադրբեջանի ղեկավարների եռակողմ հանդիպումը, որը տևել էր մոտ չորսը ժամ: Հանդիպման արդյունքում հայկական կողմի համար ամենակարևոր հարցը՝ գերիների և անհետ կորած զինվորների վերադարձի հարցը չի լուծվել, չի քննարկվել նաեւ Ղարաբաղի կարգավիճակի հարցը, փոխարենը քննարկվել է տնտեսական և տրանսպորտային կապերն ապաշրջափակման հարցը:

Քաղտեխնոլոգի համոզմամբ՝ այս հանդիպումը վերջնականապես հաստատեց բոլոր այն պնդումները, որոնք կային քաղաքական օրակարգում և հասարակության մեջ՝ կապիտուլյացիա ստորագրած գործիչը չի կարող բանակցություններում ներկայացնել Հայաստանի շահերը և Հայաստանում շատ շտապ պետք է լուծել նոր բանակցողի հարցը.

«Պետք է այս կառավարությունը հեռանա, նոր կառավարություն ձևավորվի, որը և բանակցություններ կսկսի վարել բոլոր հարցերի շուրջ և հետագայում կնախապատրաստի նոր ընտրությունների: Նիկոլ Փաշինյանի խոսնակն էր ասում, որ Հայաստանի համար առաջինը գերիների և անհետ կորածների խնդրի լուծումն է, նաև նախապայման, որ դրվում է Ադրբեջանի և Ռուսաստանի առջև, այսինքն` Հայաստանը նախապայման է դնում, որ բոլոր հարցերը կլուծվեն միայն այն պայմաններում, երբ Հայաստանի համար գերիների և անհետ կորածների հարցը լուծում ստանա, սակայն ինչպես տեսանք, այդ հարցը չի լուծվել, դա ստիպված էր խոստովանել անգամ Նիկոլ Փաշինյանը։ Դատելով այն հայտարարությունից, որը ստորագրվել է ՝ կոմունիկացիաների բացումն ապահովված է, այսինքն՝ չի բավարարվել Հայաստանի հիմնական նախապայմանը, սակայն այն, ինչ հետաքրքրում էր Ադրբեջանին և Ռուսաստանին բավարարվեց»,-մեզ հետ զրույցում ասաց քաղտեխնոլոգը՝ ընդգծելով, որ չունենք նորմալ բանակցող՝ թե՛ քաղաքական, թե՛ պրոֆեսիոնալ, թե՛ մարդկային առումով.

«Նիկոլ Փաշինյանի նույնիսկ շարժումներից է երևում, որ նա կոմպլեքսների փունջ է, ինչը բնական է, քանի որ իր համար դիսկոմֆորտ է Ալիևի հետ բանակցելը»,-ասաց Վիգեն Հակոբյանը:

Քաղտեխնոլոգն արձանագրել է՝ գերիների վերադարձը ձգձգվում է միտումնավոր նոր տարածքներ ստանալու ակնկալիքով, քանի որ Ադրբեջանը շատ լավ գիտակցում է Նիկոլ Փաշինյանի համար այս խնդրի կարևորությունը՝ հաշվի առնելով ներքաղաքական վիճակը և իր վրա ճնշումները գերիների և անհետ կորածների կողմից, ուստի Ադրբեջանը փորձում է այս հարցը չլուծելով՝ հնարավորինս շատ զիջումներ կորզել.

«Ադրբեջանին հետաքրքրում է, որ Սյունիքով ճանապարհ ունենա դեպի Նախիջևան: Քանի դեռ երկրի ղեկավարը Փաշինյանն է, նա շարունակելու է գերիների և անհետ կորածների հարցը շանտաժի տեսքով սակարկության առարկա պահել և դրա դիմաց հնարավորինս շատ բան ստանալ Փաշինյանից, հատկապես, որ Նիկոլ Փաշինյանը, ինչ-ինչ պատճառներով, որևէ կամք չի դրսևորում բանակցություններում Ալիևը ուզածը չտալու համար»,-ասաց Վիգեն Հակոբյանը:

Քաղտեխնոլոգի խոսքով՝Փաշինյանը կոմունիկացիաների ապաշրջափակումը փորձում է հայկական բիզնես համայնքներին ներկայացնել որպես կարևոր նվաճում, որը Հայաստանը կկապի Ադրբեջանի տարածքով Ռուսաստանի հետ՝ խաղալով այդ զանգվածի՝ մեծ և փոքր բիզնես շահերի վրա. «Բիզնեսմեններին ուզում է հրամցնել այն գաղափարը, որ ադրբեջանական, թուրքական, ռուսական և իրանական շուկաները ձեր առջև կբացվեն, այսինքն` փորձում է պատերազմում պարտությունը և տարածքների հանձնումը որոշ զանգվածներին փոխհատուցել բիզնես շահերով և դրանով է պայմանավորված, որ որոշ խավեր լոյալ են ընդունել պատերազմում պարտությունը և հողերի հանձնումը»,-մեզ հետ զրույցում ասաց քաղտեխնոլոգ Վիգեն Հակոբյանը:

Աղբյուր` Փաստինֆո