Փաստ ինֆո

Ռուսաստանի նախագահ Վլադիմիր Պուտինը երկուշաբթի օրը Հայաստանի վարչապետ Նիկոլ Փաշինյանի հետ երկկողմ հանդիպման ժամանակ հայտարարել է, որ ակնկալում է Լեռնային Ղարաբաղի հետ կապված բոլոր խնդիրների շուրջ պայմանավորվածությունների ձեռքբերում, փոխանցում է ՏԱՍՍ-ը:

Ռուսաստանի նախագահը նաեւ շնորհակալություն է հայտնել գործընկերոջը այն բանի համար, որ նա համաձայնել է Մոսկվա գալ՝ Ղարաբաղի շուրջ եռակողմ բանակցությունների համար:

«Իմ կարծիքով, իսկապես, չնայած այն խնդիրներին, որոնց մասին դուք ասել եք եւ որոնք դեռեւս չլուծված են մնում, հուսով եմ, որ, այնուամենայնիվ, կհաջողվի պայմանավորվել բոլոր խնդիրների, այդ թվում՝ հումանիտար բնույթի հարցերի շուրջ»,-հայտարարել Է Պուտինը:

Ռուսաստանի նախագահի կարծիքով, ընդհանուր առմամբ, երկուշաբթի կայացած եռակողմ հանդիպումն օգտակար էր: «Որպեսզի մենք կարողանանք կողմնորոշվել տարածաշրջանի ապագայի եւ տարածաշրջանում հարաբերությունների կառուցման հարցում, առաջին հերթին, իհարկե, Հայաստանի եւ Ադրբեջանի միջեւ», - նկատել է նա:

Պուտինը նաեւ ուշադրություն հրավիրեց այն հանգամանքի վրա, որ հարաբերությունները Ռուսաստանի եւ Հայաստանի միջեւ «եղել են, մնում են եւ կլինեն դաշնակցային» բոլոր ուղղություններով: «Մենք մոտ գործընկերներ ենք բազմաթիվ միջազգային կազմակերպություններում», - ասել է նա:

Ռուսաստանի նախագահը նշել է, որ, չնայած «բարդ նախորդ տարվան», Ռուսաստանի եւ Հայաստանի ապրանքաշրջանառությունը 2020 թվականի հունվար-հոկտեմբերին աճել է գրեթե 4 տոկոսով: «Այս ամենը հիմք է տալիս հուսալու, որ մենք Լեռնային Ղարաբաղի շուրջ իրավիճակի կարգավորմանը զուգահեռ դուրս կգանք այնպիսի լուծումների, որոնք, անշուշտ, օգտակար կլինեն հայ ժողովրդին, հայկական պետությանը եւ մեր երկկողմ հարաբերություններին», - ամփոփել է Ռուսաստանի նախագահը:

Աղբյուր` Փաստինֆո