Փաստ ինֆո

«Այսօր Մոսկվայում տեղի ունեցած Ալիև - Փաշինյան հանդիպումը համարում եմ Հայաստանում վարչապետի աթոռը զավթած անձի հերթական դավաճանական քայլը՝ հայ ժողովրդի նկատմամբ,- «Փաստինֆո»-ի հետ զրույցում ասել է ՀՅԴ Հայաստանի ԳՄ անդամ Լիլիթ Գալստյանը՝ վերլուծելով քիչ առաջ Մոսկվայում ավարտված եռակողմ հանդիպման արդյունքները։

«Փաշինյանի ստյոպիկսաֆարյանական սազանդարներն օրեր շարունակ թմբկահարում էին, թե «Հայրենիքի փրկության շարժում»-ը հնարավորություններ չի տալիս, որպեսզի Նիկոլը հանգիստ խղճով գնա մոսկովյան հանդիպմանը, որտեղ նա, իբր, Հայաստանի համար կարևորագույն հարցեր պետք է լուծի, այնինչ, բառացիորեն րոպեներ առաջ մենք տեսանք, թե ինչով էր իրականում զբաղված եղել Մոսկվայում Նիկոլ Փաշինյանը: Ըստ եռակողմ ղեկավարների ամփոփիչ ելույթների, ակնհայտ էր, որ Փաշինյանն անկարող է եղել լուծելու մեր հասարակության համար հրադադարից հետո, թերևս, ամենակարևոր և զգայուն հարցը՝ գերիների փոխանակման խնդիրը: Նա ինքը դժգոհություն հայտնեց այդ առիթով, իր եզրափակիչ խոսքում հայտնելով, թե հանդիպման ընթացքում իրեն չի հաջողվել հարցի լուծման վերաբերյալ որևէ պայմանավորվածության գալ: Հետևաբար, ես ուզում եմ հասկանալ՝ իսկ ի՞նչ հարց լուծեց այնտեղ այսօր Նիկոլ Փաշինյանն՝ ի օգուտ հայկական կողմի…Թերևս ոչ մի, ինչն, իհարկե, սպասելի էր, որովհետև խայտառակ կերպով պարտված ստահակը, նմանօրինակ բանակցությանը մասնակցելու իրավունք ուղղակի չուներ: Ի դեմս Ալիևի քամահրական և հեգնական վերաբերմունքի, մենք ականատես եղանք Փաշինյանի հերթական անարժանապատիվ նվաստացման տեսարանին: Իհարկե, Փաշինյանը վաղուց արդեն քաղաքական դիակ է, պարզապես ցավալին այն է, որ նվաստացնելով Հայաստանի Հանրապետության դե յուրե ղեկավարին, Ալիևն, այսպիսով, նվաստացնում է նաև մեզ ու մեր երկիրը»,- նշել է Լիլիթ Գալստյանը:

Անդրադառնալով Ադրբեջանի նախագահ Ալիևի եզրափակիչ խոսքում հիշատակված՝ տարածաշրջանային տրանսպորտային միջոցների վերաբերյալ այսօր ձեռք բերված բարենպաստ պայմանավորվածության մասին հայտարարությանը՝ Լիլիթ Գալստյանը նկատեց՝ Փաշինյանի այսօրվա մոսկովյան այցի գլխավոր նպատակը Մեղրիով թուրքի ոտքը Հայաստանի տարածքում բացելն էր. «Փաստորեն, Նիկոլին նվաստացնելով, Ադրբեջանն այսօրվա բանակցություններից կորզեց մեկ օրակարգ՝ Մեղրիով տրանսպորտային ճանապարհի բացում դեպի Նախիջևան, որի մասին խոսելիս, Ալիևը լկտիաբար հայտարարեց, թե դրանից օգտվելու են նաև տարածաշրջանի այլ երկրներ նույնպես…Իսկ ովքեր են մեր տարածաշրջանի այլ երկրները՝ պարզ չէ՞, որ Թուրքիան: Հանուն ինչի՞ է Թուրքիան ավելի քան մեկ հարյուրամյակ պայքարել Մեղրիի նվաճման համար՝ բացառապես Պանթուրքիզմի երազանք իրականություն դարձնելու նպատակի համար: Հետևաբար, փաստենք, որ դավաճան Փաշինյանն այսօր Մոսկվայում կանաչ լույս վառեց թուրքական վաղեմի երազանքի՝ Պանթուրքիզմի իրականացման համար»,- արձանագրել է Լիլիթ Գալստյանը:

Ամփոփելով հանդիպման իր տպավորությունները, ՀՅԴ ԳՄ անդամ Լիլիթ Գալստյանը ցավով նկատել է՝ ակնհայտ էր, որ Ադրբեջանն իր համար փառահեղ հաղթանակի մի նոր էջ է բացում, թողնելով մեզ մեր 5000 անմեղ զոհերի, 10. 000-ից ավել վիրավորների և դեռ անհայտ թվով անհետ կորածների ու գերեվարվածների անորոշ ճակատագրի, կորցրած հայրենիքի ու պարտության զգացողության, պառակտված հասարակության և անհեռանկար պետականության հետ, ինչը Նիկոլ Փաշինյանի նվերն էր՝ հայ ժողովրդին: Ըստ վերջինիս, պակաս ցավալի և անպատվաբեր չէ նաև այն հանգամանքը, որ վերոհիշյալ պարտությունը մենք դեռևս շարունակում ենք կրել դավաճան և ստահակ, թրքահպատակ Նիկոլ Փաշինյանի հետ:

Լիլիթ Գալստյանը փաստել է նաև. «Երբ ստահակ և դավաճան Փաշինյանը հասկացավ, որ ինքն այսօրվա հանդիպմանը հաջողության չի հասնում՝ որևէ կերպ լուծելու այս պահին մեր ժողովրդի առաջ ծառացած ամենազգայուն խնդիրը՝ գերիների վերադարձի հարցը, նա պարտավոր էր այդ նվաստացուցիչ հանդիպման ավարտին ուղղակի թողնել ու դուրս գալ դահլիճից, ոչ թե կանգնել ու Ալիևի հեգնական ու արհամարհական վերաբերմունքի ներքո պարտվողական ելույթ ունենալ: Իրականում, Նիկոլ Փաշինյանը մեր ձախողումների և պետականության ոչնչացման խորհրդանիշն է, նա որևէ դրական ձեռքբերում մեր երկրի համար չի կարող բերել: Այս մարդը մեր համազգային ամոթն է, մեր կորուստների գլխավոր մեղավորն ու պատճառը: Նա հստակ հանձնառությամբ է իշխանության եկել՝ քանդելու Հայոց պետականությունը, իսկ այդ հանձնառությունը նա ստացել է մեր վաղեմի և ոխերիմ թշնամիներից, ինչն էլ մինչ այս պահը «պատվով» և անշեղորեն կատարում է: Հետևաբար, դավաճանին օր առաջ հեռացնելու և պատասխանատվության ենթարկելու օրակարգը շարունակում է մնալ «Հայրենիքի փրկության շարժման» գլխավոր ու առաջնային նպատակը»։

Հեղինակ՝ Նվարդ Մանվելյան

Աղբյուր` Փաստինֆո