Փաստ ինֆո

62 հայ զինծառայողներին որպես ահաբեկիչներ ներկայացնելու Ադրբեջանի նպատակը հայատյաց քաղաքականությունն առաջ տանելը և դրա հիման վրա քաղաքական ինչ-ինչ դիվիդենտներ շահելն է։ Այս մասին «Փաստինֆո»-ի հետ զրույցում ասաց միջազգային իրավունքի փորձագետ Արա Ղազարյանը։ 

Նշենք, որ Ադրբեջանի արտգործնախարարը դիմել էր ՄԱԿ-ի գլխավոր քարտուղարին և ներկայացրել մի փաստաթուղթ, որտեղ մեր 62 ռազմագերիները ներկայացված են որպես ահաբեկիչներ։

Փորձագետը նկատեց՝ պետք է իրավաբանորեն հիմնավորել, որ զինծառայողները կատարել են ահաբեկչական գործողություններ․

«62 զինծառայողները եղել են Հայաստանի կամ Արցախի կանոնավոր բանակի զինծառայողներ, որոնք պատերազմական հանցագործություններ չեն կատարել։ Նման պայմաններում նրանց չեն կարող ահաբեկիչներ համարել։ Նույն կերպ էլ Կարեն Ղազարյանին էին ներկայացնում որպես ահաբեկիչ, սակայն վերջինս վերադարձավ Հայաստան, իսկ Ադրբեջանն այդպես էլ որևէ ապացույց չներկայացրեց»,-ասաց Արա Ղազարյանը՝ նշելով, որ քիչ է միայն վերացական ասել, որ նրանք ահաբեկիչ են։

Նախ` պետք է ապացուցեն, որ անօրինական զինված խմբավորման անդամ են և նրանց գործողություններն ուղղված էին խաղաղ բնակիչների դեմ, իսկ նման փաստեր չկան։ Փորձագետն ընդգծեց՝ զինված հակամարտության ժամանակ կանոնավոր զորքի, զինված ստորաբաժանման գործողությունները չեն կարող համարվել ահաբեկչություն։

«Ադրբեջանական կողմը հրաժարվում է Հայաստանին վերադարձնել զինծառայողներին, չունի դրա օրինական հիմքերը և փորձում են լեգենդներ հորինել։ Սա էլ հերթական լեգենդն է, որը փաստերով պետք է կոտրել, ապացուցել, որ դա նշանակում է՝ նրանց հետապնդում են հայ լինելու պատճառով։ Այսինքն` խտրական վերաբերմունք է հայ զինվորների նկատմամբ»,-նշեց Արա Ղազարյանը։

Նրա խոսքով՝ հայկական կողմը կարող է իրավական գործընթաց սկսել անհատական կամ միջպետական գանգատի շրջանակներում։ Արա Ղազարյանը նկատեց՝ եթե ՄԱԿ-ում է բարձրացվել հարցը, դա արդեն դիվանագիտական, քաղաքական շրջանակ է և պետք է այնտեղի մոնիտորինգային խմբերի ուշադրությունը հրավիրել այս իրավիճակի վրա։

Անդրադառնալով ԱԺ «Լուսավոր Հայաստան» խմբակցության պատգամավոր Անի Սամսոնյանի այն հայտարարությանը, որ հնարավոր է ադրբեջանական կողմը փորձում է վարչապետի մոսկովյան այցին ընդառաջ ռազմագերիների փոխանակման հարցն ավելի թանկ վաճառել հայկական կողմին, Արա Ղազարյանն ասաց․

«Հնարավոր է։ Դա արդեն քաղաքական գնահատական է։ Հնարավոր է ամեն կերպ փորձեն օգտվել իրենց ընձեռված հնարավորությունից։ Միջազգային իրավունքի համաձայն՝ նրանց կողմում հայտնվածներն ուղղակի պետք է անհապաղ հայրենադարձվեն, բայց ադրբեջանցիները փորձում են ձգձգել և ինչ-ինչ առավելություններ ստանալ, ինչն անօրինական է և չի բխում ո՛չ միջազգային իրավունքի նորմերից, ո՛չ էլ Ադրբեջանի ներպետական իրավունքի նորմերից»,-ասաց փորձագետը։

Վերջինս նշեց, որ ադրբեջանցիները սիրում են հայելանման իրավիճակներ ստեղծել։ Քանի որ հոկտեմբերի սկզբին հայկական կողմը շրջանառության մեջ դրեց այն թեզը, որ ադրբեջանցիները ներառում են ահաբեկիչներ և վարձկաններ, ապացույցներ ներկայացրեց և՛ Ադրբեջանին, և՛ աշխարհին, այժմ ադրբեջանական կողմը փորձում է ստեղծել դրա հակակշիռը․

«Ժամանակին Կարեն Ղազարյանի կեղծ գործով փորձում էին հակակշիռ ստեղծել Քելբաջարի դիվերսանտների գործով։ Նման հայելանման իրավիճակներ ստեղծելով՝ փորձում են ստեղծել թեմայի պարիտետ, որին միջազգային հանրությունը մոտենա որպես տարածաշրջանի խնդիր, այլ ոչ թե մեկ պետության կողմից միջազգային իրավունքի նորմերի խախտում։

Հիմա փորձում են ներկայացնել, որ եթե մենք պնդում ենք՝ իրենց զինված ուժերում ներգրավված են ահաբեկիչներ, ապա իրենք էլ ներկայացնում են ապացույցներ, որ մենք էլ ենք մեր զինված ուժերում ներգրավում ահաբեկիչներ, որոնք անօրինական գործողություններ են կատարում իրենց տարածքում։ Մոտավորապես այս թեման են զարգացնում»,-ամփոփեց Արա Ղազարյանը։

Աղբյուր` Փաստինֆո