Փաստ ինֆո

Այն, որ իմքայլական 88 պատգամավորներից շատերը ոչինչ են առանց Նիկոլ Փաշինյանի և պատգամավորական կենսագրության վրա ուղղակիորեն դաջված է Նիկոլ Փաշինյան անունը, հանրությունը նոր չէ, որ գիտի։

Պարզապես նրանք արդեն սկսել են հատ-հատ այդ մասին բարձրաձայնել և դա անում են մեկը մյուսին մեղադրելու և անվանարկելու համատեքստում։

Իրենց կոտորակված նիկոլության մասին, բնականաբար յուրաքանչյուրն էլ գիտեր և գիտեր ի սկզբանե։ Հո պատահական չէ՞, որ հանրային ընկալման մեջ այդ 88-ը հիմնականում սեփական անուն-ազգանունով չեն էլ հիշվում, քանի որ իրենք ուղղակի Նիկոլի ստվերներն են, Նիկոլի ֆեյքերը, Նիկոլի վկաները։ Իսկ ամենահետաքրքիրն այն է, որ նրանք այդ փաստից բնավ չեն էլ վիրավորվում։

Օրինաչափ է, որ Նիկոլի բերած դատարկ թղթի տակ նրանք պատրաստ են փակ աչքերով ստորագրել։ Օրինաչափ է, որ նրանք կարող են մանդատից հրաժարվել, հետո՝ Նիկոլի հրամանով հայտարարել, թե աֆեկտի տակ են այդ քայլն արել։ Նրանք բոլորը փոքրիկ ռոբոտիկներ են, որոնց հեռակառավարման վահանակը Նիկոլի ձեռքում է։

Այս մասին իմքայլականների մամլո խոսնակը, որի անունն էլ առանձնապես նշանակություն չունի, այսօր անդրադարձել է իմքայլական պատգամավոր Սոֆյա Հովսեփյանի՝ խմբակցությունից դուրս գալու որոշման շրջանակում: Նկատենք, որ սույն պատգամավորն իր այսօրինակ մտադրության մասին դեռ կապիտուլյացիայի համաձայնագրից հետո էր բարձրաձայնել։ Այսինքն, որոշումը խմորման ընթացքում էր և հիմա հասունացավ։

Եվ ահա խոսնակը գրել է՝ «եթե քվեաթերթիկի դարձերեսին չլիներ Իմ քայլը, 1. Նիկոլ Փաշինյան, չէր լինի աշխարհում Սոֆյա Հովսեփյան-պատգամավոր երևույթը»։ Կամ՝ «եթե իր հետ նույն ընտրատարածքում, նույն քվեաթերթիկի վրա գրված լիներ «Նիկոլի ուսապարկ», ինքը վստահաբար մեկ հորիզոնական ցածր տեղ կզբաղեցներ»։

Այսինքն, իմքայլականները ոչ միայն հատ-հատ են տառապում թերարժեքության բարդույթով, վկա՝ նրանց բրոունյան շարժում հիշեցնող քայլերը, այլև այս ուժի ընդհանրական գիտակցության մեջ 88-ից յուրաքանչյուրը և նրանց ամբողջությունը առանց Նիկոլ ոչինչ են համարում իրենց։ Կամ, ինչպես խոսնակն է ասում, որի բերանով, անշուշտ իր առաջնորդի տեսակետն է հնչում, «Նիկոլի ուսապարկ»-ն ավելի շնչավոր նիկոլ է, քան՝ պատգամավորներից յուրաքանչյուրը։

Փաստ է, որ նրանց իշխանության է բերել, իշխանություն է տվել Նիկոլը և ավելի մեծ շաման, քան Նիկոլն է, նրանց համար գոյություն չունի։ Առնվազն՝ իմքայլականների զանգվածային մտածողությունն այդպիսին է։

Իսկ հոտից կամ ոհմակից առանձնացող հատուկենտներին, բնականաբար, մյուսները տոտալ հարձակման են ենթարկելու։ Վերևից եկած հրամանով, կամ ուղղակի «Նիկոլի ուսապարկ»-ի սինդրոմով։ Ահա սրանց արժեքային համակարգը։

Եվ այնուհանդերձ, էլի կլինեն իմքայլականներից առանձնացողներ։ Անշուշտ, նաև նրանց աջ ու ձախ խարազանող ոհմակը կլինի։

Դավաճանի հանցակիցը լինելու և մնալու քայլը և հետքայլը իմքայլականներից յուրաքանչյուրն ինքը պիտի անի։ Թեպետ այսքան ուշացած հետքայլը նրանց պատասխանատվությունից չի ազատելու։

Աղբյուր` Փաստինֆո