Փաստ ինֆո

«Հայաստանի Հանրապետությունում գործող բոլոր պետական և ուժային կառույցների ներկայացուցիչները, պաշտոնը ստանձնելուց առաջ երդում են տալիս, որով նրանք պատասխանատվություն են ստանձնում ծառայել ոչ թե ինչ - որ անձի, այլ՝ ազգային և պատական շահերին: Սովորաբար, ղեկավար անձը փորձում է աշխատել այնպես, որ իր գործունեությունը որևէ ձևով հակասության մեջ չմտնի պետական շահի հետ, սակայն, այսօր մեր երկրում այնպիսի եզակի մի իրավիճակ է, երբ պետության ղեկավարն, իր գործունեության արդյունքում, կազմաքանդել է երկրորդ պետականություն հանդիսացող Արցախի Հանրապետությունը, ինչպես նաև՝ անվտանգային լրջագույն սպառնալիքներ է ստեղծել ՀՀ-ի համար»,- «Փաստինֆո»-ի հետ զրույցում ասել է քաղաքագետ Երվանդ Բոզոյանը:

Համադրելով փաստերը` քաղաքագետ Երվանդ Բոզոյանը արձանագրել է Նիկոլ Փաշինյանի վարած ապաշնորհ և կործանարար քաղաքականության նյութական և բարոյական հետևանքները. «Իշխանության ձախողած դիվանագիտության հետևանքով սանձազերծված պատերազմի արդյունքում, մենք կորցրել ենք մոտ 3 մլրդ. դոլարի հասնող զենք - զինամթերք, նույն չափերի հասնող ունեցվածք ենք կորցրել ազատագրված տարածքներում և Լեռնային Ղարաբաղի այն հատվածներում, որոնք պարտության հետևանքով հայտնվել են ադրբեջանական կողմի վերահսկողության տակ: Պաշտոնական տվյալներով մենք ունենք ավելի քան՝ 5000 նահատակված զինվոր, որոնց ընտանիքներն աջակցության և կարիքի մեջ են հայտնվել, ունենք 10.000-ից ավել տարբեր աստիճանի մարմնական վնասվածքներ ստացած զինծառայողներ, էլ չեմ խոսում գերեվարվածների և անհետ կորածների մասին, որոնց վերաբերյալ վիճակագրական տվյալներ, մեզ, չգիտես ինչ տրամաբանությամբ, պետությունը չի տրամադրում: Եթե այս պահին մեր ձեռքի տակ եղած բոլոր տվյալները համադրենք, ապա կարող ենք փաստացի արձանագրել, որ Հայաստանի Հանրապետության ղեկավար հանդիսացող Նիկոլ Փաշինյանն իր ապաշնորհ պաշտոնավարման ընթացքում, պարտված պատերազմի հետևանքով, մեր պետությանն ավելի քան 12 մլրդ. դոլարի վնաս է հասցրել: Եթե այս ամենին գումարենք նաև այն իրողությունը, որ մենք, փաստացի, կորցրել ենք նաև Արցախի պետականությունը, ապա այս ամենն իրար հետ վերցրած, պետք է փաստենք, որ երկրի ղեկավարի գլխավորությամբ և նրա անմիջական մասնակցությամբ տեղի է ունեցել պետական դավաճանություն»:

Անդրադառնալով Ազգային Ժողովի «Իմ քայլը» խմբակցության պատգամավոր Սոֆյա Հովսեփյանի` բուռն քննարկման արժանացած՝ խմբակցությունը լքելու թեմային, քաղաքագետը նկատել է՝ գուցե նա և այդ դաշինքից շատերը Ազգային Ժողով են հասել հենց Նիկոլ Փաշինյանի՝ ժամանակին ունեցած հեղինակության շնորհիվ, սակայն, ըստ վերջինիս, արդեն այսօր, նրանցից յուրաքանչյուրն ինքն իրեն հարց պետք է տա. «Եթե այդ պատգամավորներից շատերն այսօր մեղադրանքներ են ներկայացնում նրանց հասցեին, ովքեր՝ հեռանալով խմբակցությունից, այսպես ասած, դավաճանում են Նիկոլ Փաշինյանին, նրանք արդյո՞ք գիտակցում են, որ հեռացող պատգամավորն ինքն իրեն հարց է տալիս՝ դավաճանել Նիկոլ Փաշինյանի՞ն, թե՞ Հայաստանի Հանրապետությանը: Ստացվում է, որ խմբակցությունը լքող պատգամավորը, տվյալ դեպքում՝ Սոֆյա Հովսեփյանն, ինքն իր համար որոշում է կայացրել՝ չդավաճանել Հայաստանին, իսկ չդավաճանել Հայաստանին, ավտոմատ կերպով հանգեցնում է՝ դավաճանել Նիկոլ Փաշինյանին: Չեմ ուզում քննարկել, թե ինչո՞ւ նա դա արեց այսքան ուշացած, կամ արդյո՞ք հիմա նրա այս քայլը էական որևէ փոփոխություն կբերի մեր իրականության մեջ: Փաստը հետևյալն է՝ այն պատգամավորները, ովքեր որոշում կկայացնեն մինչև վերջին պահը հավատարիմ մնալ Նիկոլ Փաշինյանին, այսինքն՝ փաստացի դավաճանել Հայաստանի Հանրապետությանը, բոլորն անխտիր կանգնելու են ռազմական տրիբունալի առաջ և պատասխան են տալու իրենց քայլերի և որոշումների համար: Ռազմական տրիբունալը քննարկելու է նրանց հարցը՝ որպես մարդկանց, ովքեր ընտրվելով ժողովրդի կողմից և լինելով Ազգային Ժողովի պատգամավոր, պետական դավաճանության մասնակից են դարձել», - ասում է քաղաքագետը:

Հեղինակ՝ Նվարդ Մանվելյան

Աղբյուր` Փաստինֆո