Փաստ ինֆո

Հասարակությանը տեղեկատվություն չի տրամադրվում, թե ինչ է Նիկոլ Փաշինյանը մտադիր ստորագրել Մոսկվայում՝ հունվարի 11-ին, Հայաստանի ու ԱԱԾ-ի տնօրենները այս օրերին հանդիպել են, թե ոչ եւ ինչ նպատակով։ Եւ այս գաղտնիությունն ինքնին վտանգավոր է։ «Փաստինֆո»-ի հետ զրույցում ասել է իրավաբան Երվանդ Վարոսյանը։ 

Ինչպես արդեն տեղեկացրել ենք՝ երեկ մամուլում տեղեկություններ տարածվեց առ այն, որ ՀՀ և Ադրբեջանի ԱԱԾ տնօրենները Նախիջևանի տարածքում հանդիպում են ունեցել։ Արձանագրենք, որ ըստ մամուլի, սա արդեն ԱԱԾ տնօրենների երկրորդ հանդիպումն է։ Հանրության շրջանում մտավախություն կա, որ այս գաղտնի հանդիպումների միջոցով նոր «բանավոր պայմանավորվածություններ» են ձեռքբերվում՝ հունվարի 11-ի Մոսկվա այցից առաջ, որոնք, ամենայն հավանականությամբ, կամրագրվեն արդեն փաստաթղթային տարբերակով՝ հունվարի 11-ին։ Ավելին՝ տեղեկություններ են շրջանառվում առ այն, որ զիջումների փաթեթում մտնելու է նաև հակաթուրքական արտաքին քաղաքականություն չվարելու, ինչպես նաեւ Հայոց ցեղասպանության միջազգային ճանաչման հարցը բարձրացնելու հրաժարվելու Հայաստանի պարտավորությունը։

Փաստաբան Վարոսյանի արձանագրմամբ՝ խնդիրը նրանում է, որ մենք գրեթե առհասարակ տեղեկություն չունենք, ինչն ինքին վտանգավոր է։ Չգիտենք՝ հունվարի 11-ին ինչ է պատրաստվում ստորագրել Նիկոլ Փաշինյանը, ընդհանուր տեղեկություններ կան, տարբեր աղբյուրներից, որ փաստաթուղթը կարող է ունենալ հետևյալ տեսքը կամ բովանդակությունը։

«Ունենք՝ հերթական մանիպուլացիոն, էժանագին ստատուս՝ գրված Նիկոլ Փաշինյանի կողմից, որից հասկացանք, որ ինչ-որ վատ բան է լինելու և ինքը ստիպված փորձում է դա քողարկել՝ խաղալով գերիների, անհետ կորածների ծնողների զգացմունքների վրա։ Երբ կարդում ես, հասկանում ես, որ այս մարդը կրկին փորձում է խաբել, ուրեմն ինչ-որ վտանգավոր բան կա, բայց ինչ կա՝ հասարակությունը կրկին որևէ բան չգիտի»,- նշեց Վարոսյանը։

Ինչ վերաբերում է զիջումներին, Վարոսյանն ընդգծեց, որ քանի դեռ Նիկոլ Փաշինյանը նստած է վարչապետի աթոռին, ՀՀ-ն ամեն ինչ զիջելու է։
«Եթե անգամ ինքը չունենար այդ դիտավորությունը՝ ամեն ինչ զիջելու, լինելով պարտված ղեկավար, դիմադրողականություն չունի ասելու՝ ոչ։ Ինքը չի կարող ասել՝ «ոչ», ինքը բոլորին «այո» է ասելու՝ հատկապես Իլհամ Ալիևին »,- նշեց Վարոսյանը՝ հավելելով, որ այս ամենի լուծումը մեկն է՝ այդ անձը պետք է ՀՀ վարչապետ չլինի, իսկ մնացյալ հարցերը՝ չորրորդական նշանակություն ունի, խնդիրն այդ մարդու մեջ է։

Ըստ Վարոսյանի՝ եթե Նիկոլ Փաշինյանը մնա իշխանության, վերջինս շրջելու է ՀՀ արտաքին քաղաքական վեկտորը։

«Նա դա նոր չէ սկսել։ Այո, Թուրքիայի հետ մերձեցումը՝ իր որոշ մանկլավիկների շուրթերով հասկանում ենք, որ նպատակը Հայաստանը թուրքական արբանյակի վերածելն է։ Քանի դեռ Փաշինյանը վարչապետ է, Ցեղասպանության միջազգային ճանաչման հարցն այնքան չորրորդական է լինելու՝ սպասվող աղետի համեմատ։ Համոզված եմ՝ եթե այս խմբակը պահպանեց իշխանությունը, աշխարհի քարտեզի վրա Հայաստան պետություն չի լինելու, ուր մնաց Ցեղասպանության միջազգային ճանաչում»,- նշեց Վարոսյանը։

Հեղինակ՝ Իզաբել Սահակյան

Աղբյուր` Փաստինֆո