Փաստ ինֆո

Զոհված զինծառայողների աճյունների որոնողական աշխատանքների գործընթացում այլ խնդիրներ են առաջացել՝ Զանգելանի տարածքում։ Այս մասին ֆեյսբուքյան ուղիղ եթերում ասել է Արսեն Ղուկասյանը, ում եղբորորդին դեռ համարվում է անհետ կորած։ 

«Զանգելանի տարածքում ինչ-որ խնդիր են առաջացրել, որ Արցախի կողմից այդ տարածք չմտնեն, այլ՝ մտնեն Մեղրիի, Կապանի կողմից։ Իհարկե՝ փորձել ենք ամեն ինչ անել, որ Արցախի կողմից լինի, քանի որ այս կողմից շատ ավելի ծանոթ են տարածքներին, ավելի հեշտ է և այստեղ կան մասնագետներ, որոնք ամիսներ շարունակ այդ գործն արել են, չգիտենք՝ այն կողմից նորմալ աշխատող կլինի՝ տեղանքին ծանոթ »,- նշեց նա՝ հավելելով, որ այդ հարցի շուրջ բանակցություններ կլինեն։

Նա նաև հայտնեց, որ երեկ հանդիպում է եղել Էդմոն Մարուքյանի հետ, ինչի ընթացքում անհետ կորած զինվորների հարազատները հայտարարել են, որ, եթե Մարուքյանի՝ անհետ կորած զինվորների հարազատներին օգնելու նախաձեռնությունն արվում է՝ որպես հայ մարդու կողմից, որն իսկապես պատրաստ է օգնել, իրենք շնորհակալ կլինեն, բայց, եթե որևէ քաղաքական ուժ պատրաստվում է օգնել՝ քաղաքական դիվիդենտ շահելու նպատակով, ապա ավելի լավ է չանեն դա, ինչին ի պատասխան հայտնել են, որ որևէ նման նպատակ չեն հետապնդում։ Ղուկասյանն անդրադարձավ նաև Երևանում ստեղծված իրավիճակին առ այն, որ զինծառայողների ծնողները պահանջում են, որ իրենց որդիներին չուղարկեն Արցախ՝ պատճառաբանելով, թե սպաները չեն գնում։ Ղուկասյանը նշեց, որ սպաներին բազմիցս ասվել է, որ գան, շատերը չեն ցանկանում գալ, որովհետև վախենում են սեփական անձի համար։

«Իրենք շատ լավ գիտեն՝ ինչու են վախենում, մենք ձեզ խոստանում ենք՝ մատով չենք կպնի, եկեք գտեք այդ երեխեքին, գոնե ինչ որ ձևով փորձեք թեթևացնել ձեր մեղքը։ Այս իրավիճակը նաև ձեզնից է կախված։ Այդ երեխեքին էլ եմ հասկանում, իրենց վիճակն էլ, ծնողների ապրումներն էլ եմ հասկանում, բայց գիտեմ, որ ճանապարհներին խնդիր չկա, քանի որ այս ճանապարհներին քանի անգամ գնացել-եկել եմ, վերջին անգամ էլ հենց որդուս հետ եմ եկել։ Եթե ես իմանայի, որ ճանապարհին խնդիր կլինի, հաստատ իմ որդուն որպես ծնող չէի համարձակվի հետս բերել, բայց ես վստահ իմ որդուն բերել եմ ինձ հետ։ Ձեր երեխեքն էլ են երեխա, էստեղ մնացած երեխեքն էլ են երեխա, էլի մերն են՝ խալխինը չեն, նրանք էլ են ուզում տուն գնալ, բայց դե այսօրվա դրությամբ, եթե ամբողջ զորքը Արցախից հանեն, բա պոստերն ով պահի »,- նշեց նա։

Մանրամասները՝ տեսանյութում

Աղբյուր` Փաստինֆո