Փաստ ինֆո

Եթե Փաշինյանը գնում է Մոսկվա, ուրեմն ակնկալվում է, որ նոյեմբերի 9-ի փաստաթղթի շարունակությունը պետք է լինի: Այս մասին ԱՆ շենքի դիմաց ակցիայի ժամանակ լրագրողների հետ զրույցում ասաց «Այլընտրանքային նախագծեր» խմբի վերլուծաբան Էլինար Վարդանյանը՝ հավելելով, որ եթե հերթական ստորացումն է սպասվում Հայաստանին, ապա իրավունք ունեն իմանալու՝ ինչ փաստաթուղթ է ստորագրվելու:

«Նոյեմբերի 9-ից հետո տեղի ունեցան իրադարձություններ, որոնք նույնիսկ նոյեմբերի 9-ի հայտարարության մեջ արծարծված չէին, դրանք գաղտնի պայմանավորվածություններ էին,  որոնք ոչ միայն Արցախի, այլ՝ ՀՀ-ի համար ոչ նպաստավոր էին»,-ասաց Վարդանյանը:

Վերջինս նշեց, որ նման հարցերը բանավոր պայմանավորվածությամբ չեն լուծվում.

«Մենք չգիտենք՝ իրականում ինչ է կատարվում Փաշինյանի գլխում, ամեն հաջորդ անգամ տեսնում ենք, որ ոչ կշռադատված որոշումներ են լինում, ես ունեմ մտավախություն Մոսկվայում  լինելու է հերթական ոչ կշռադատված հանդիպումը և մեզ համար ստորացուցիչ փաստաթուղթը»,-ասաց Էլինար Վարդանյանը՝ արձանագրելով, որ Փաշինյանի այսօրվա գրառումը հաստատում է՝ բոլոր մտահոգությունները տեղի են:

«Որևէ մեկը չգիտի՝ Փաշինյանը հերթական ինչպիսի ստորացմանն է պատրաստ և ուզում ենք հասկանալ՝ հերթական ինչ խայտառակությունն է սպասվում ՀՀ-ին»,-ասաց Վարդանյանը:

Հարցին՝ ինչպե՞ս է ԱՆ-ն փաստաթուղթը համապատասխանեցնելու սահմանադրականությանը, Էլինար Վարդանյանը նշեց.

«Իրավական տեսակետից եթե նայենք, զուտ խորհրդատվական տեսակետից փաստաթղթի քննարկում է լինելու, քանի որ ԱՆ-ն չէ սահմանադրականության հարցը որոշողը, բայց սա կարող է լինել նախնական քայլ՝ հետագայում ստորագրվող փաստաթուղթը սահմաանդրական դատարան ներկայացնելու պարագայում դրա սահմանդրական վիճարկելիությունը կանխելու առումով»,-լրագրողների հետ զրույցում ասաց Էլինար Վարդանյանը:

Աղբյուր` Փաստինֆո