Փաստ ինֆո

Խորհրդարանական ընդդիմադիր կուսակցությունները՝ «Լուսավոր Հայաստանը» և «Բարգավաճ Հայաստանը», տեղյակ չեն՝ ինչ օրակարգով է Նիկոլ Փաշինյանը հունվարի 11-ին մեկնում Մոսկվա, որտեղ նախատեսվում է Փաշինյանի, ՌԴ նախագահ Վլադիմիր Պուտինի եւ Ադրբեջանի նախագահ Իլհամ Ալիեւի եռակողմ հանդիպումը:

Հիշեցնենք, որ հանդիպմանն ընդառաջ Ալիևը հայտարարել է, որ Հայաստանի տարածքով Ադրբեջանի եւ Թուրքիայի միջեւ տրանսպորտային միջանցք է ձեւավորվում եւ ըստ շրջանառվող տեղեկատվության, հունվարի 11-ին նախատեսվում է հենց Նախիջեւանի հետ Ադրբեջանի ցամաքային կապի հաստատումն ամրագրող փաստաթղթի ստորագրումը։

Նշենք, որ մինչ օրս չկա պաշտոնական տեղեկատվություն Մոսկվայում կայանալիք հանդիպման օրակարգի մասին: Հայտնի է միայն, որ ՌԴ-ից բժիշկների հատուկ խումբ է եկել Նիկոլ Փաշինյանից անալիզներ վերցնելու ու կորոնավիրուսի թեստ անցկացնելու համար, քանի որ չեն վստահում նրա անձնական բժիշկների տրամադրած տեղեկատվությանը։

«Փաստինֆո»-ն խորհրդարանական ընդդիմադիր կուսակցություններից ճշտել, արդյոք խորհրդարանական հանրապետության խմբակցությունները տեղեկացված են Փաշինյանի՝ Մոսկվա կատարվելիք այցի ու բանակցությունների սեղանին դրված փաստաթղթի մասին։
ԼՀԿ խմբակցության ղեկավար Էդմոն Մարուքյանը հայտարարել է, որ Մոսկվայում կայանալիք հանդիպման վերաբերյալ ոչ մի տեղեկության չի տիրապետում:

Օրակարգին անտեղյակ է նաեւ «ԲՀԿ» խմբակցությունը։

«Տեղյակ չենք՝ ինչ օրակարգով է լինելու հանդիպումը, քանի որ ոչ մի պաշտոնական տեղեկություն չկա:Իշխանությունները պարտավոր են հանրությանը ներկայացնել այն օրակարգը, որով գնում են Մոսկվա, ոչ թե գան և նոր փաստի առջև կանգնեցնեն»,-«Փաստինֆո»-ի հետ զրույցում ասաց ԲՀԿ խմբակցության քարտուղար Արման Աբովյանը՝ մտավախություն հայտնելով, որ հանդիպմանը նոր փաստաթուղթ կստորագրվի։

«Հաշվի առնելով իշխանությունների գործողությունների տրամաբանությունը, շատ մեծ մտավախություն կա, որ իշխանություննները կրկին քայլեր կձեռնարկեն, որոնք կվտանգեն Հայաստանը և Արցախը»,-ասաց Աբովյանը:

Անդրադառնալով Հայաստանի տարածքով Ադրբեջանի եւ Թուրքիայի միջեւ տրանսպորտային միջանցք է ձեւավորմանը վերաբերող Ալիևի հայտարարությանը՝ պատգամավորը արձանագրեց, որ դրանով Ալիեւը վերահաստատել է, որ հայկական իշխանությունները՝ Փաշինյանի գլխավորությամբ, հանցավոր պասիվություն են ցուցաբերում տեղի ունեցող գործընթացներում.

«Ալիևը իրեն իրավունք է վերապահում հայտարարություններ անել ճանապարհի մասին, նույնիսկ հրավիրում է ուրիշ պետությունների, որ օգտվեն այն ճանապարհից, որն անցնելու է Հայաստանի տարածքով, սա շատ վտանգավոր է»,-ասաց Աբովյանը:

Աղբյուր` Փաստինֆո