Փաստ ինֆո

Նոյեմբերի 9-ի հայտարարությունը որևէ սահմանափակում չի մտցնում Հայաստանի և Արցախի միջև տարբեր մակարդակներում կապերի մասով: Այս մասին «Փաստինֆո»-ի հարցին ի պատասխան հայտարարել է ՀՀ ԱԳՆ խոսնակ Աննա Նաղդալյանը:

Հիշեցնենք՝ ՀՀ արտաքին գործերի նախարար Արա Այվազյանը հունվարի 5-ին աշխատանքային այցով մեկնել էր Արցախ, որտեղ ունեցել է մի շարք հանդիպումներ, այդ թվում՝ ԱՀ նախագահի, ԱԺ նախագահի, արտաքին գործերի նախարարի հետ, որի շրջանակներում նաեւ ստորագրվել է Հայաստանի և Արցախի արտաքին գործերի նախարարությունների միջև 2021 թվականի խորհրդակցությունների պլան: Այցի եւ ստորագրված փաստաթղթերի առնչությամբ բողոք էր ներկայացրել Ադրբեջանը՝ հայտարարելով, թե դա հակասում է եռակողմ հայտարարությանը։ Ավելին՝ այն որակել էր, որպես պաշտոնական Երեւանի «սադրանք»։

«Փաստինֆո»-ի խնդրանքով արձագանքելով Բաքվի հայտարարություններին՝ ԱԳՆ խոսնակն արձանագրել, որ այդ պնդումները ամբողջովին սին և հիմնազուրկ են, նոյեմբերի 9-ի հայտարարությունը որևէ սահմանափակում չի մտցնում Հայաստանի և Արցախի միջև տարբեր մակարդակներում կապերի մասով:

«Նոյեմբերի 9-ի եռակողմ հայտարարությունը, որն ուղղված էր հրադադար հաստատելուն և Արցախ ռուս խաղաղապահներ տեղակայելուն, չի արձանագրում որևէ համաձայնություն՝ Արցախի կարգավիճակի մասով: Եվ այդ տեսակետից այն բոլոր պնդումները, որ Արցախի կարգավիճակի մասով տեղի են ունեցել փոփոխություններ, իրականությանը չեն համապատասխանում»,-ասաց Աննա Նաղդալյանը:

Վերջինս նաև նշեց, որ Արցախի կարգավիճակը պետք է որոշվի խաղաղ գործընթացի արդյունքում՝ ԵԱՀԿ Մինսկի խմբի համանախագահների կողմից առաջարկված սկզբունքների, ժողովուրդների ինքնորոշման իրավունքի հիման վրա:

Աղբյուր` Փաստինֆո