Փաստ ինֆո

Սյունիքի մարզի Շուռնուխ համայնքի՝ Ադրբեջանի վերահսկողության ներքո անցած հատվածում այսօր ցուցանակ է տեղադրվել՝ Կուբաթլուի շրջան, քենդ (ադր. գյուղ) Շուռնուխ》 գրությամբ։ Այս մասին «Փաստինֆո»֊ի հետ զրույցում ասաց Շուռնուխ համայնքի ղեկավար Հակոբ Արշակյանը։

Նրա խոսքով՝ գյուղը սահմանազատվում է մայրուղով, որի ներքին հատվածում պետք է կանգնեն ադրբեջանցիները, վերին հատվածում՝ գյուղի բնակչի այգին է։

«Իր երեխան հիմա պետք է վարագույրը քաշի և նայի՝ «Губатлинский район, кенд-Шурнух» գրությունը, երեխան նորից փակի կամ մի փոքր երկար նայի»,֊նշեց Արշակյանը։

Ավելի վաղ տեղեկացրել ենք, որ Փաշինյանի կողմից՝ բանավոր պայմանավորվածությունների հիման վրա Ադրբեջանին են անցնում հայկական մի շարք բնակավայրեր, որոնց մասին բառ անգամ նշված չի եղել նոյեմբերի 9֊ի լույս 10֊ի գիշերը ստորագրված կապիտուլյացիոն ակտում։ Հենց նման բանավոր պայմանավորվածությունների և GPS-ով սահմաններ գծելու հետևանքով Ադրբեջանին է անցել նաև հայկական Շուռնուխ գյուղի 12 տուն։Երեկ տեսանյութ տարածվեց, որտեղ երևում է, որ բնակիչներն այրում են իրենց տները, որ այն չանցնի Ադրբեջանին։

Համայնքապետը մեզ հետ զրույցում նշեց, որ տունն այրել է մեկ բնակիչ՝ խնդրելով մյուսներին չայրել իրենց տները։

«Ինքն իր տունն այրել է՝ բոլորի փոխարեն և ասել՝ չփորձվեք որևէ մեկը տուն այրել»,֊ նշեց նա՝ հավելելով, որ տունն այրողը երեք պատերազմի մասնակից է և չի համակերպվում ստեղծված իրավիճակին։
Արշակյանը տեղեկացրեց, որ գյուղում եղել են ազատ տներ և մարդիկ, որոնք այս պահին չեն բնակվում Շուռնուխում իրենց տները տրամադրել են տեղահանված շուռնուխցիներին՝ որպես ժամանակավոր կացարան, մի քանիսը տեղափոխվել են Գորիս և Կապան։

«Փառք Աստծո, տեղավորվել են, այդքան անզոր չենք։ Մի քանի տնակներ մարզպետարանը տրամադրել է, բերել- տեղադրել է, երկու ընտանիք էլ այդ տնակներում կապրեն՝ մինչև հարցը լուծվի»,֊նշեց նա՝ հավելելով, որ հետագայում նոր տներ կկառուցվեն, կան բարերարներ, որոնք պատրաստ են տներ, նաև՝ թաղամասեր կառուցելու։

«Գորիսի համայնքապետարանն է կանգնած ժողովրդի հետ, համայնքապետն էլ, որ դեկտեմբերի 30֊ից մինչև երեկ գտնվում էր Շուռնուխում, երեկ երեկոյան գնաց Գորիս, ասաց՝ վաղը նորից կվերադառնա»,֊նշեց Արշակյանը։

Ինչ վերաբերում է փոխհատուցմանը, ապա մարզպետարանից տեղեկացվել են, որ փոխհատուցում կլինի՝ բոլոր 12 տան բնակիչների։ Համայնքապետը մտահոգություն հայտնեց՝ ստացված փոխհատուցման դիմաց տուն գնելու վերաբերյալ, մասնավորապես, մտավախություն կա, որ գյուղն այդ դեպքում կդատարկվի, պետք է փոխհատուցումը տրամադրել պայմանագրային կամ այլ մեխանիզմով, որ մարդիկ դուրս չգան Շուռնուխից, շարունակեն բնակվել գյուղում, որովհետև նույնիսկ վերևի թաղի բնակիչները տարակարծություններ ունեն ապագայի հետ կապված, չգիտեն՝ ինչ կլինի հետագայում։

«Փոխհատուցում լինելու է, որոշակի գումար կտան, բայց պետք է խնդրենք, համոզենք՝ փաստերով, որ այստեղ ապրել հնարավոր է լինելու, որովհետև այդ հատվածը երբեք չի եղել ադրբեջանական։ Ճանապարհի տակի հատվածը վերականգնվելու է, լինելու է ՀՀ վարչական տարածք»,֊նշեց նա։

Հեղինակ՝ Իզաբել Սահակյան

Աղբյուր` Փաստինֆո