Փաստ ինֆո

Ադրբեջան-ՀՀ իշխանություններ հարաբերություններում մեր իշխանությունը կապիտուլացիա ստորագրած կողմ է, հետևաբար, Ալիևը և իր վարչակազմը իրենց թույլ են տալիս ցանկացած արտահայտություն և գործողություն: «Փաստինֆո»-ի հետ զրույցում նման տեսակետ է հայտնել քաղաքագետ Հրանտ Մելիք-Շահնազարյանը:

Ինչպես ավելի վաղ հայտնել ենք, որ Ադրբեջանը բողոքել է ՀՀ ԱԳ նախարար Արա Այվազյանի Արցախ կատարած այցի կապակցությամբ: Նախարարը Արցախ է մեկնել հունվարի 5-ին, որտեղ հանդիպումներ է ունեցել ԱՀ նախագահի, ԱԺ նախագահի, արտաքին գործերի նախարարի հետ, որի շրջանակներում նաեւ ստորագրվել է Հայաստանի և Արցախի արտաքին գործերի նախարարությունների միջև 2021 թվականի խորհրդակցությունների պլան: Ադրբեջանը հայտարարել է, թե այցն ու ստորագրված փաստաթուղթը հակասում է եռակողմ հայտարարությանը: Պաշտոնական Երեւանը դեռեւս չի արձագանքել այս հայտարարությանը:

Քաղաքագետը նկատում է, որ նոյեմբերի 10-ի համաձայնագրում նշված չէ, որ փոխադարձ այցեր պետք է չլինեն Հայաստանի և Արցախի միջև, սակայն ակնհայտ երևում է, որ բացի կապիտուլացիոն փաստաթղթից, կան նաև այլ պահանջներ հայկական կողմին ուղղված, որոնք, ինչպես Նիկոլ Փաշինյանն է ասել, բանավոր համաձայնությամբ ձեռք բերված պայմանավորվածություններ են.

«Դրանք պայմանավորվածություններ չեն, դրանք ակնհայտ պահանջներ են, չեմ բացառում, որ այդ պահանջներից մեկը լինի Հայաստան-Արցախ կապի լիարժեք չեզոքացումը և վերացումը, ես կարծում եմ, մենք առաջիկայում նոր զարգացումների ականատես ենք լինելու, և կհասկանանք՝ էլ ինչ է հանձնել դավաճան իշխանությունը Ադրբեջանին»,-ասաց Հրանտ Մելիք-Շահնազարյանը՝ հավելելով, որ տեղի ունեցող բոլոր զարգացումները անտրամաբանական են, և ամեն անգամ ստիպված ենք կանխագուշակել՝ աներևակայելի էլ ինչ կարող է լինել:

Քաղաքագետի համոզմամբ՝ Երևանը չի կարող արձագանքել Բաքվի որևէ դժգոհությանը կամ պահանջին, քանի Ադրբեջան-ՀՀ իշխանություններ հարաբերություններում մեր իշխանությունը կապիտուլացիա ստորագրած կողմ է, հետևաբար, Ալիևը և իր վարչակազմը իրենց թույլ են տալիս ցանկացած արտահայտություն, ցանկացած գործողություն, որովհետև շատ լավ գիտեն, որ Հայաստանից որևէ պատասխան չի լինելու.

«Սա առաջին դեպքը չի, երբ պաշտոնական Երևանը չի պաշտպանում մեր շահերը անգամ դիվանագիտական դաշտում և ակնհայտ է, որ այսօր հայկական կողմի շահը բացարձակապես պաշտպանված չէ»,-մեզ հետ զրույցում ասաց Հրանք Մելիք-Շահնազարյանը:

Աղբյուր` Փաստինֆո