Փաստ ինֆո

Ադրբեջանն արձագանքել է ՀՀ արտգործնախարար Արա Այվազյանի Արցախի հանրապետություն կատարած այցին ու այն գնահատել ոչ ավել, ոչ պակաս` նոյեմբերի 10 եռակողմ հայտարարության խախտում:

Նշենք, որ հունվարի 5-ին Հայաստանի արտգործնախարար Արա Այվազյանը Արցախ կատարած աշխատանքային այցի շրջանակներում առաջին հանդիպումն է ունեցել Արցախի նորանշանակ ԱԳ նախարար Դավիթ Բաբայանի հետ:

Այվազյանը և Բաբայանը ստորագրել են Հայաստանի և Արցախի արտաքին գործերի նախարարությունների միջև 2021 թվականի խորհրդակցությունների պլան, ինչի վերաբերյալ շտապել է սանձարձակ  հայտարարությամբ հանդես գալ Ադրբեջանը: Բաքուն հայտարարել է, թե  հանդիպումն ու «փաստաթղթեի» ստորագրումը հակասում են նոյեմբերի 10-ի եռակողմ հայտարարությանը եւ «լիովին չի համապատասխանում ռազմական գործողությունների դադարեցումից հետո տարածաշրջանում խաղաղության, անվտանգության եւ համագործակցության հաստատման շրջանակներին»:

 Ադրբեջանի ԱԳՆ մամուլի ծառայության ղեկավարը հայտարարել է, թե  նոյեմբերի 10-ի հայտարարությունը ստորագրել է հենց Հայաստանի վարչապետը՝ դրանով իսկ այդ երկրի կառավարության վրա դնելով դրանից բխող պարտավորությունները։

«Պաշտոնական Երևանի կողմից այդ պարտավորությունների խախտումը սադրանք է, և նման գործողությունները, որոնք ուղղված են ներքին լսարանին, չեն ծառայում տարածաշրջանում իրավիճակի կարգավորմանը։

Հայաստանի պաշտոնյաները չպետք է առաջնորդվեն անհիմն երեւակայություններով, այլ պետք է ընդունեն նոր իրականությունը տարածաշրջանում», - նշված է Ադրբեջանի ԱԳՆ-ի հայտարարության մեջ:  

Աղբյուր` Փաստինֆո