Փաստ ինֆո

Մտահոգիչ է ՀՀ պետական պարտքը: Տարին ամփոփել ենք 9 միլիարդին ձգտող պետական պարտքով, ինը գերազանցում է կառավարելի կոչված սահմանը: 

«Փաստինֆո»-ի հեռ զրույցում «Հայացք» վերլուծական կենտրոնի փորձագետ Լիլիա Ամիրխանյանը նշեց, որ պետական պարտքի թույլատրելի շեմը կազմում է ՀՆԱ-ի 60 տոկոսը և այս պարագայում մենք արդեն ունենք 60 տոկոսի շեմը գերազանցող պետական պարտք, ինչը խնդրահարույց է:

«Մեզ համար ավելացել են նոր ծախսեր, դեռ չունենք կարիքների լիարժեք գնահատում: Նշանակում է՝ արդեն իսկ վտանգավոր շեմը հատած պետական պարտքը դեռ 2021 թվականին պետք է ավելանա: Հասկանալի է, որ երկրների կողմից ՀՆԱ-ի շեմը գերազանցելու պարագայում փոխառություն տվողները, միջազգային կառույցները, բանկերը, որոնք վարկեր են տալիս, արդեն շատ ավելի խստացված պայմաններով են տալիս կամ այլ կերպ ասած Հայաստանի համար ավելի թանկ գումարներ են հասանելի լինելու, ավելի վատ պայմաններով, իսկ այդ ամենն ի վերջո վճարում է ՀՀ քաղաքացին»,-նշեց փորձագետը:

Վերջինս նշեց՝ տարեվերջին արժույթի միջազգային հիմնադրամի կողմից ներգրավեցինք հերթական պետական պարտքը՝ բյուջետային վարկը, որը հիմնական ֆունկցիաների իրականացման համար ներգրավվող միջոցներն են. «Այսինքն եթե ծրագրային վարկն ինչ-որ հաստատված ծրագրի համար տրվող գումարն է, բյուջետային վարկը կենսաթոշակներ վճարելու, պետական աշխատավարձեր վճարելու համար է: Փաստացի այս վարկը ներգրավել ենք բյուջետային խնդիրները լուծելու համար: Այսինքն իրավունք ունենք մտածելու, որ այսօր չկան այնքան միջոցներ, որ միգուցե որոշ ժամանակ անց կանգնենք թոշակ վճարել չկարողանալու խնդրի առաջ»,-նշեց Լիլիա Ամիրխանյանը:

Փորձագետի կարծիքով` եթե լինի տնտեսական ճիշտ քաղաքականություն, լինեն կառավարչական բարձր հմտություններ, պրոֆեսիոնալիզմի բարձր մակարդակ, ապա հնարավոր է իրավիճակը շտկել:
Լիլիա Ամիրխանյանը նշում է, որ այսօր մենք ունենք բավական աղետալի վիճակում գտնվող տնտեսություն: 2020-ի 11 ամիսների համար ունենք տնտեսական ակտիվության ցուցանիշի 7.2 տոկոսոանոց անկում ընդ որում սա տարվա վերջնական ամփոփիչ ցուցանիշ չէ և միտում կա, որ այդ ցուցանիշը կլինի շատ ավելի բարձր. «Մտահոգիչ են մակրոտնտեսական այն ցուցանիշների անկումները, որոնք մեր ՀՆԱ-ում մեծ կշիռ ունեն:

Խոսքն առևտրաշրջանառությանն է վերաբերում, որը 11 ամիսների ընթացքում 13.5 տոկոսով կրճատվել է, ծառայությունների ոլորտը 13.6 տոկոսով կրճատված, շինարարության ոլորտը, որը կրճատվել է 10 տոկոսի սահմաններում: Ընդ որում տարեսկզբից ամենաբարձր մակարդակով հայտարարվեց, որ արտագնա աշխատողները չգնան, քանի որ այստեղ շինարարության աշխատանքներ կան նրանց համար, բայց այդ խոստման թվային արդյունքը 11.2 տոկոս անկումն է:

Այսինքն սա փաստացի ապացույց է, որ այն, ինչ ասվում է, ասվում է այդ պահին հանրության մեծ հատվածի համար ականջահաճո ինչ-որ բաներ ասելու համար: Միգուցե ցանկությունը կա, բայց իրականացնելու ցանկությունն արտացոլված են վիճակագրական տվյալներում»,-եզրափակեց փորձագետը:

Աղբյուր` Փաստինֆո