Փաստ ինֆո

Տարիներ շարունակ խոսել ենք թուրքական սպառնալիքներից, քննարկել տարբեր սցենարներ, որոնք այսօր կյանքի են կոչվում։

Բացի թուրք֊ադրբեջանական արտաքին սպառնալիքներից, կան ներքին սպառնալիքներ։ Ներքին լսարանում՝ ներքին թուրքերի շրջանակներում կան որոշ ակտիվացումներ, որոնք համագործակցաբար արտաքին սպառնալիքների հետ՝ ավելի բարդ իրավիճակ են ստեղծում մեզ համար։ Այս մասին հրավիրված մամուլի ասուլիսին ասել է Ռուբեն Մելքոնյանը։

Նրա խոսքով՝ տարբեր շրջանակներ խոսում են մեր հայրենիքի տարբեր մասերի ոչ հայկական լինելու մասին, ընդ որում, հղումը թուրք֊ադրբեջանական ռեդակետներն են, որոնք տարիներ շարունակ ներկայացվել են որպես թուրքական կեղծ պատմագրության դրսևորումներ։

«Հիմա ինչ-որ մարդիկ խոսում են, որ այս գյուղը հայկական չէ, այն պետք է հանձնել, մենք ուրիշի տարածք ենք մտել, օկուպանտ ենք և այլն։ Ցավոք՝ մենք բախվել ենք նաև թուրքական ներքին ընկալման հետ»,֊նշեց նա։

Նման քարոզչությունը, ըստ Մելքոնյանի, մեծ ծրագրի մաս է կազմում և այդ մարդիկ էլ գիտակցաբար կամ անգիտակցաբար մաս են կազմում։

Նրա խոսքով՝ մեր երկրում ապազգային և հայրենադավ կերպարներ են բազմացել, որոնց համար ՀՀ տարածքները ադրբեջանական են, ազատագրողները՝ հանցագործ։

Անդրադառնալով սահմանազատման աշխատանքներին՝ Մելքոնյանը նշեց, որ սահմանազատումը և սահմանների հաստատումը երկարատև գործընթաց է, օրինակ, ԽՍՀՄ և Թուրքիայի միջև սահմանազատումը տեղի է ունեցել երեք֊ չորս տարվա ընթացքում։

«Այն, ինչին մենք ականատես ենք լինում, չունի որևէ հիմք։ Պետք է հասկանանք, որ Խորհրդային Միությունում, ըստ էության, ընդհանուր պետության մեջ գոյություն է ունեցել Հայաստան և Ադրբեջան։ Եվ այժմ հիմք ընդունել վաղուց գոյություն չունեցող պետության ինչ-որ ներքին կարգավորումներ և համարել որպես անքննելի ճշմարտություն, ինքնարդարացման դրսևորում է։

Դա որևէ կապ չունի իրականության հետ և սահմանազատման ժանրի հետ, սա ուղղակի կապիտուլյացիա է, որը իշխանական քարոզչամեքենան ներկայացնում է ինքնախաբեության, ինքնարդարացման գաղափար»,֊նշեց նա՝ հավելելով, որ սա նոր ճգնաժամ է։

Աղբյուր` Փաստինֆո