Փաստ ինֆո

«Շուրջ 2.5 տարի է Հայ առաքելական սուրբ եկեղեցու և վեհափառ հայրապետի նկատմամբ ակտիվ ոտնձգություններ են լինում: Վերջին շրջանում ևս որոշ մարդիկ փորձում են ստվեր գցել մեր եկեղեցու, վեհափառի վրա և տարբեր կոչերով են հանդես գալիս»,- այս մասին Այսօր Սուրբ Գայանե եկեղեցու բակում ասաց ՀՀԿ խոսնակ Էդուարդ Շարմազանովը։ Դեռևս երեկ տեղեկություն էր տարածվել, թե 2021-ի առաջին կիրակնօրյա պատարագին պետք է Վեհափառ Գարեգին Բ-ին գահընկեց անեն որոշ խմբեր։

ՀՀԿ խոսնակն ասաց, որ առաջինը եկել էին կիրակնօրյա պատարագի, երկրորդ՝ եկել են համերաշխությունը հայտնելու Առաքելական եկեղեցուն, վեհափառ հայրապետին, ընկերներով հավաքվել են, որ դիմավորենք վեհափառ հայրապետին։ Քաղաքացիները մուտք գործեցին Սուբ Գայանե եկեղեցի, մասնակցեցին պատարագի, հաղորդություն ստացան։Իսկ ինչու այսօր եկեղեցու բակը ավելի մարդաշատ չէ, ինչպես նկատվում է օրինակ՝ ֆեյսբուք սոցկայքում, Շարմազանովը նշեց․

«Եթե 2.5 տարի առաջ էլ այսպես համախմբված հավաքվեինք Մայր աթոռի շուրջ, դժվար թե որևէ մեկը հանդգներ վեհափառի նկատմամբ անհարգալից վերաբերմունք ցուցաբերեր, բայց մարդը սխալական է, մեր բացթողումների և սխալների վրա ենք բոլորս սովորում, և լինելու ենք միշտ մեր եկեղեցու կողքին, որ որևէ մեկի մտքով չանցնի անարգել մեր սրբությունները»։

ՀՀԿ խոսնակը անդրադառնալով Սյունիքի Շուռնուխ գյուղի շուրջ ծավալվող իրադարձություններին և Սյունիքի մարզպետի այն հայտարարությանը, որով հայտնում է, թե ՀՀ զինված ուժերն ու ռուս խաղաղապահները տիրապետում են իրավիճակին, ասաց․
«Ես չեմ հասկանում՝ ի՞նչ է նշանակում՝ ամեն ինչ վերահսկողության տակ է, եթե էդ մարդը հանձնել է Արցախի 75 տոկոսը, հանձնում է Սոթքը, Սյունիքի տարածքները և որոշ տարածքային կորուստներ կունենանք Գեղարքունիքից, չեմ բացառում նաև Տավուշից: Ի՞նչ իմանանք՝ այդ հողատուն ի՞նչ բանավոր պայմանավորվածություն է ձեռք բերել: Խնդրի լուծումը ո՛չ Սյունիքում է, ո՛չ Գեղարքունիքում է, ո՛չ Տավուշում է, խնդրի լուծումը պետք է լինի Երևանում, հասարակությունը պետք է համախմբվի և թույլ չտա, որ այս հողատու գործիչը կառավարի Հայաստանը»։

ՀՀԿ խոսնակը նշեց նաև, որ ամեն օր տեսնում ենք նորանոր կորուստներ և Հայաստանի և հայ ժողովրդի անվտանգությունը չի կարող պաշտպանված լինել, իսկ հողատուն պետք է հեռանա։

«Առաջին պայմանը՝ վերականգնել մեր անվտանգությունը, հզորացնել մեր պետականությունը, ազգային պետության զարգացում ապահովել, ավանդական արժեքների հիման վրա, այս ապազգային, հողատու արարածից ազատվելն է»,-ասաց Շարմազանովը:

Աղբյուր` Փաստինֆո