Փաստ ինֆո

Հունվարի 1-ին Հորադիզից և Ֆիզուլիից դուրս է բերվել 7 հայ զինծառայողի դի, 4-ը` Հորադիզից, 3-ը` Ֆիզուլիից: Այս մասին Արցախից տեղեկացրել է անհետ կորած զինծառայողի հարազատ Արսեն Ղուկասյանը:

Հունվարի 2-ին` այսօր, նախատեսվում է մուտք գործել երեք, որոնցից երկուսը` Հադրութի, մեկը` Ջաբրայիլի ուղղությամբ:

Նա տեղեկացրել է, որ ողջ մնացած զինվորների որոնողական աշխատանքները ժամանակավոր դադարեցվել են, քանի որ ադրբեջանցիները թույլ չեն տալիս. ասել են, թե. «այսքան մտել եք, ոչինչ չեք արել, հիմա ինչ եք անելու»: Ներկայումս բանակցություններ են ընթանում ադրբեջանցիների հետ  նաեւ  ՌԴ խաղաղապահ ուժերի հրամանատար Մուրադովի միջոցով` ողջ մնացած զինվորների որոնողական աշխատանքներն վերսկսելու ուղղությամբ:

«Մնում է մեր ղեկավարությունը փորձի մի բան անի, որ կարողանան քայլ անել` ողջ մնացած երեխաներին հայտնաբերելու համար», - նշել է նա:

Արսեն Ղուկասյանն անդրադարձել է նաեւ Հայաստանի դիահերձարաններում տիրող վիճակին` այն բնորոշելով խայտառակ վիճակ:

«Թշնամուն հանձնված տարածքներից դուրս բերված հայ զինվորների մարմինները տարել են  Կապանի մորգ, պարկերով տեղավորել երկրորդ հարկի ինչ-որ սենյակում և բացել պատուհանները: Տարածքում անտանելի հոտ է տիրում, որ շենքին մոտենալ չի լինում», - ասել է Ա.Ղուկասյանը:

«Այդ հարցի պատասխանատո՞ւն էլ են թուրքերը, չեք կարողանո՞ւմ հետները լեզու գտնել, թե՞ դա էլ է ռուսի թեման… դուք նույնիսկ զոհերի մարմինները չեք հարգում, գոնե մի հատ ռեֆռեժեռատոր ուղակեք, որ այդ մարմինները չփտեն, մի հատ էլ խոլերա կբերեք գլխներիս, ով է նման բան անում»,-դիմելով ՀՀ իշխանություններին՝ ասել է նա ու ավելացրել. «պարոն վարչապետ, դա՞ էլ է թուրքի, Ալիեւի  թեման»:

Նշենք, որ անհետ կորած էին համարվում Ա. Ղուկասյանի եղբայրն ու եղբոր որրդին: Դեկտեմբերին հաջողվել էր հայտնաբերել նրա եղբոր մարմինը, բայց զարմիկի գտնվելու վայրը հայտնի չէ:

Մանրամասները` տեսանյութում

Աղբյուր` Փաստինֆո