Փաստ ինֆո

2020թ․-ին կորոնավիրուսից և պատերազմից ամենաշատը տուժած ոլորտներից մեկը զբոսաշրջությունն է։ Չնայած վնասի տարեկան ցուցանիշները դեռ պարզ չեն, այնուամենայնիվ փորձագետները կարծում են՝ վնասը մեծ է և կգերազանցի մեկ միլիարդը։

«Փաստինֆո»-ի հետ զրույցում Տուրիզմի հայկական ֆեդերացիայի նախագահ Մեխակ Ապրեսյանը նշեց, որ միջազգային զբոսաշրջության համար, ըստ էության, տարին կանգնած է եղել․ «Ներգնա տուրիզմ առ այսօր չունենք։ Առաջին եռամսյակին 311 հազար ներգնա զբոսաշրջային այցելություն ենք, ինչը չնչին ցուցանիշ է։ Տարեկան ցուցանիշները փետրվարին կլինեն, բայց կարծում եմ՝ միլիարդի կհասնի վնասը։ Անցած տարի ունեցել ենք մոտ 1․9 մլն ներգնա այցելություն։ Ներքինը մի փոքր շնչեց, բայց երբ նայում ենք առաջին 9 ամսվա տվյալները, 30-40 տոկոս նվազում ունենք»,-ասաց Մեխակ Ապրեսյանը։

Անդրադառնալով հարցին, թե զբոսաշրջության ոլորտում գործող քանի տնտեսվարող է այս ընթացքում տուժել, Մեխակ Ապրեսյանն ասաց, որ դժվար է թվեր նշել, քանի որ նույնիսկ չգիտեն՝ քանի կազմակերպություն կա․ «Դա մեր կարևոր խնդիրներից է։ Մշտապես բարձրաձայնել էինք այդ հարցը, որ պետք է զբոսաշրջության ոլորտում ունենանք վարչական ռեգիստր և մի շարք գործունեության տեսակներ պետք է լիցենզավորվեն։ Այդ դեպքում այդ կազմակերպությունների փակվելուց հետո կկարողանանք հստակ թիվ նշել։ Ընդհանուր վերլուծություններով, քննարկումներով երևում է, որ գործունեությունը դադարեցնող տնտեսվարողներ կան։ Տուրիզմի ֆեդերացիայի անդամների շրջանում, կարծեք թե, փակվող կազմակերպություններ չկան։ Բոլորը դեռ ատամներով փորձում են պահպանել, բայց ոլորտի վիճակը ծանր է»,-նշեց Մեխակ Ապրեսյանը։

Վերջինս նկատեց՝ կարևոր է՝ գիտակցաբար հասկանանք, որ եթե իսկապես ուզում ենք տնտեսությունը վերականգնել, ապա պետք է հասկանանք, որ առանց զբոսաշրջության ոլորտի դժվար է լինելու․ «Էկոնոմիկայի նորանշանակ նախարարը տնտեսական աճի համար երկնիշ թիվ է պլանավորում։ Ողջունելի է, բայց պետք է նաև անել, իսկ կյանքի կոչելու համար պետք է գիտակցենք, որ առանց տուրիզմի շատ դժվար կլինի, եթե ոչ անհնար, և այս ոլորտն անպայման պետք է փլուզումից փրկենք ու ամեն ինչ անենք, հնարավորություն տանք, որ իր տեմպով, դինամիկ զարգացումն ունենա, որովհետև հենց տուրիզմն է շարժիչ ուժ հանդիսանալու տնտեսության համար»,-ասաց փորձագետը։

Հարցին՝ ինչպե՞ս կազդի պատերազմի ելքը, տարածքներ հանձնելը զբոսաշրջության ոլորտի վրա, Մեխակ Ապրեսյանը նշեց, որ հայկական կողմի վերահսկողությունից դուրս մնացած տարածքներում մեծ թվով և մեծ արժեք ունեցող պատմամշակութային ժառանգություն կա, ինչը, իհարկե, բացասական ազդեցություն կարող է ունենալ։

Մեխակ Ապրեսյանը նկատեց՝ զբոսաշրջությունը պետք է նպաստի նաև Հայաստանի, հայ ժողովրդի իմիջի վերականգնմանը։

Դիտարկմանը, թե որքանով ապահով կլինի Հայաստանը օտարերկրյա զբոսաշրջիկների համար, Մեխակ Ապրեսյանը հույս հայտնեց, որ այն ապահով ուղղություն կլինի, ինչի համար ամենակարևոր պայմանը տարածաշրջանում իրավիճակի կայունացումն է։
«Եթե իրավիճակը կայունանա, կարծում եմ՝ ոլորտն արագ կվերականգնվի, միայն թե չթողնենք փլուզվի։ Այստեղ շատ մեծ աշխատանք ունենք անելու։ Դիվանագիտական բոլոր խողովակներով ամեն ինչ պետք է անենք, որ ամբողջ աշխարհում վերականգնենք որպես կայուն, ապահով երկիր մեր իմիջը»,-ամփոփեց Մեխակ Ապրեսյանը։

Աղբյուր` Փաստինֆո