Փաստ ինֆո

Նիկոլ Փաշինյանի իշխանության հետ կոալիցիա կազմելու դեպքում ԲՀԿ-ն որպես քաղաքական ուժ կվերանա,- «Փաստինֆո»-ի հետ զրույցում նման հայտարարությամբ է հանդես եկել քաղտեխնոլոգ Արմեն Բադալյանը։

Հիշեցնեք, որ օրեր առաջ Նիկոլ Փաշինյանը հայտարարել է, թե քաղաքական խորհրդակցություններ է սկսում խորհրդարանական ու արտախորհրդարանական քաղաքական ուժերի հետ՝ արտահերթ ընտրություններ անցկացնելու հարցի շուրջ։ Մինչդեռ ընդդիմությունը, Հայրենիքի փրկության շարժումը պահանջում է Նիկոլ Փաշինյանի հրաժարականը, իսկ արտահերթ ընտրությունների անցկացումն այս փուլում համարվում է կործանարար երկրի համար։ Այդուհանդերձ, այսօր տեղեկություն տարածվեց մամուլում, որ ԲՀԿ առաջնորդ Գագիկ Ծառուկյանը պատրաստվում է հանդիպել Նիկոլ Փաշինյանի հետ։

Քաղտեխնոլոգը նկատեց, որ ճիշտ է,  սա դեռեւս տարածված տեղեկատվության մակարդակով է, բայց ԲՀԿ-ն դեռ չի հերքել, որ նման հանդիպում է կայանալու:
Նրա կարծիքով՝ վարչապետը ցանկություն ունի փորձել 17-ի դաշինքից ԲՀԿ-ին իր կողմը գրավել, ինչպես նախկինում ՀՀԿ-ն էր անում։ Այսինքն՝ Նիկոլ Փաշինյանը կարող է փորձել կոալիցիոն կառավարություն ձևավորել և նախարարական պորտֆելներ տալ՝ դրանով փորձելով բաժանել Հայրենիքի փրկության շարժումը, քանի որ ԲՀԿ-ն մարդկային մեծ ռեսուրս ունի։

« Սա ՀՀԿ-ի կողմից օգտագործված տեխնոլոգիա է, բայց երբ ՀՀԿ-ն էր սա առաջարկում, նրանք ինչ-որ ազդեցիկ դիրք ունեին և կարող էին իրենց պայմանները առաջադրել, քանի որ, չնայած հասարակաության կողմից մերժվում էին, բայց պարտված չէին և ունեին իրենց ընտրազանգվածը, հիմա իրավիճակը այլ է, գործող վարչապետը հասարակության կողմից մերժված է, պատերազմում պարտվել է, կապիտուլյացիա է ստորագրել և քաղաքական սուբյեկտ չի ներկայացնում, բայց ուզում է նույն քաղաքականությունն իրականացնել՝ ինչ հանրապետականները»,-ասաց փորձագետը:

Քաղտեխնոլոգը դժվարացավ պատասխանել՝ կհաջողվի՞ իշխանությանը ԲՀԿ-ին իր կողմը գրավել, թե՝ ոչ, քանի որ ԲՀԿ-ն հակված է վարչապետի փոփոխության հասնել.
«ԲՀԿ-ն Հայրենիքի փրկության շարժման ակտիվ անդամ է և փորձում է շարժումը առաջ տանել, չկան ինչ-որ մեսիջներ, որ փորձում է կոալիցիա ձևավորել, որովհետև պետք է հասկանալ, հենց ԲՀԿ-ն կոալիցիա կազմի, որպես կուսակցություն զրոյացվելու է, ով այսօր վարչապետի կողքը կանգնեց, նա զրոյացվում է»,-ասաց Բադալյանը:

Քաղտեխնոլոգն արձանագրում է՝ իշխանության հետ կոալիցիա կազմելու դեպքում ԲՀԿ-ն, որպես քաղաքական ուժ, կվերացվի, Հայրենիքի փրկության շարժումը կշարունակի իր գործունեությունը, «Իմ քայլը» և վարչապետը ոչինչ չեն շահի, իսկ ԲՀԿ-ն իմիջային շատ ուժեղ հարված կստանա:

Փորձագետի դիտարկմամբ՝ վարչապետը փորձում է ԲՀԿ-ի կապիտալը օգտագործելով երկարացնել իշխանությունը. «Վարչապետը հասկանում է, որ իմքայլականներով չի կարող իշխանություն պահել, քանի որ մերժված է թե՛ Ռուսաստանի, թե՝ Արևմուտքի, թե՝ հայ հասարակության կողմից»,-ասաց Արմեն Բադալյանը:

Մեր այն հարցին՝ արտահերթ ընտրությունների անցկացման դեպքում ի՞նչ վտանգներ կլինեն, քաղտեխնոլոգը պատասխանեց.

«Կախված է նրանից, թե ո՞վ կկազմակերպի ընտրությունները և երբ, Արևմուտքը և Ռուսաստանը ինչպե՞ս կվերաբերվեն այդ գործընթացին, Հայաստանի ինստիտուցիոնալ կառույցները ի՞նչ վերաբերմունք կունենան վարչապետի նկատմամբ:

Ենթադրենք, վարչապետը փետրվարի կեսին գնաց ընտրությունների այդ դեպքում ընդդիմությունը կարող է համաձայն չլինել, շրջափակման ենթարկել ընտրատեղամասերը, ինչպես վարչապետը՝ դատական համակարգի շենքերը և խափանի ընտրական գործընթացը»,-ասաց Արմեն Բադալյանը:

Աղբյուր` Փաստինֆո