Փաստ ինֆո

Խորհրդարանի արտահերթ նիստում քննարկվում է Հայաստանի Հանրապետության Ազգային ժողովի պատգամավոր Նաիրա Զոհրաբյանի` որպես Մարդու իրավունքների պաշտպանության և հանրային հարցերի մշտական հանձնաժողովի նախագահի լիազորությունների դադարեցման մասին հարցը:

«Իմ քայլը խմբակցությունը՝ հավատարիմ մնալով ԱԺ գործունեության թափանցիկության ապահովման սկզբունքին, անհրաժեշտ է համարում անդրադառնալ այն հանգամանքներին, որոնցից պարզ է դառնում, որ առկա է պատգամավոր Նաիրա Զոհրաբյանի կողմից՝ ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնում հետագա պաշտոնավարման անհնարինությունը»։

ԱԺ «ԻՄ քայլը» խմբակցության պատգամավոր Արթուր Հովհաննիսյանը ընթերցեց Նաիրա Զոհրաբյանի՝ ֆեյսբուքում կատարած գրառումները, որոնք ատելության խոսք են պարունակում, ապա հավելեց, որ պատգամավորը բազմիցս է հանդես եկել նույն արժեհամակարգային տրամաբանությամբ։

«ԱԺ պատգամավորի գրառումներից պարզ է դառնում, որ պատգամավորի կողմից արվում են սահամանադրությամբ ամրագրված մարդու՝ որպես բարձրագույն արժեք անօտարելի արժանապատվությունը ոտնահարող, նվաստացնող և վիրավորանք պարունակող հայտարարություններ, նաև սահմանադրությանը ուղղակիորեն հակասող դասակարգումներ մարդկանց միջև, ավելին՝ այդ դասակարգմամբ պայմանավորելով վերջիններիս սահմանադրությամբ ամրագրված հիմնարար ընտրելու իրավունքի իրացումը»,- ասաց Հովհաննիսյանը։

Պատգամավորը նշեց, որ Զոհրաբյանը չի կարող լինել մի հանձնաժողովի նախագահ, որի գործունեության առանցքը մարդու իրավուքների պաշտպանությունն է։ Վերջինիս լիազորություններից զրկելուց հետո ԲՀԿ-ն երկշաբաթյա ժամկետում կարող է առաջադրել հանձնաժողովի նախագահի նոր թեկնածու, եթե չի առաջադրում, դրանից հետո քվոտան անցնում է իշխող մեծամասնությանը։ Հովհաննիսյանը նշեց, որ ընդդիմադիր խմբակցությունը նոր թեկնածու՝ իր տեղեկություններով չի առաջադրի, բայց ունի այդ իրավունքը։

Իմ քայլից Վլադիմիր Վարդանյանն էլ հարցրեց՝ «Արդյոք չեք մտածում, որ Տիկին Զոհրաբյանը առավելապես հանդես է եկել որպես պատգամավոր, եթե չլիներ հանձնաժողովի նախագահ՝ նա չպե՞տք է ենթարկվեր պատասխանատվության՝ նույն վարքագիծը դրսևորելու պարագայում»։
Հովհաննիսյանը պատասխանեց, կարծում է՝ ողջ ներուժը պետք է կիրառեն և արագացնեն պրոցեսը՝ ԱԺ-ում էթիկայի հանձնաժողով ստեղծելու համար, որպեսզի պատգամավորների վարքագիծը քննարկեն։

«Այս պահին Տիկին Զոհրաբյանի գործողությունները չեմ կարող դիտարկել բացառապես որպես ԱԺ պատգամավորի գործունեություն, որովհետև նա ԱԺ-ից հանես է գալիս մարդու իրավուքների պաշտպանությամբ»,- ասաց պատգամավորը։

Աղբյուր` Փաստինֆո