Փաստ ինֆո

Սևազգեստ մայրերը ամենամյա այցելությամբ Եռաբլուր պանթեոնում էին։ Այսպես է արդեն որերորդ տարին անցնում սևազգեստ կանանց ամանորը։

«Մեզ բացակա չդնեք» հասարակական կազմակերպության անդամ Սաթենիկ Խլղաթյանը նշեց, որ ծնողների խնդիրներն այսօր անտեսված են. առողջական խնդիրներից մինչև կոմունալ վճարի խնդիրներ։

«Ոչ մեկս ամանորի չենք սպասում։ Մեր ամանորը սա էր։  Հավաքվեցինք, եկանք այստեղ նշեցինք, գնում ենք տուն։ Մարդ կա, որին զանգել ենք ասում ենք՝ գնում ենք Եռաբլուր, ասում է՝ տաք շոր չունեմ, որ հագնեմ գամ։ Չեմ ուզում նրանց նվաստացնել։ Նրանք հպարտ, հարուստ ու ուժեղ ընտանիքներն են։ Այսօր քաղաքապետն էլ, վարչապետն էլ մեր համար Եռաբլուրն է»,- լրագրողների հետ զրույցում ասաց Խլղաթյանը։

Եռաբլուրում էին զոհված ազատամարտիկների մայրերը, հայրերը, այրիներն ու քույրերը։ Ավանդույթի համաձայն՝ արդեն 26 տարի այցելում են Եռաբլուր՝ հարգանքի տուրքը մատուցելու զոհված ազատամարտիկների հիշատակին։ Խլղաթյանը նկատեց, որ իրենց հաճախ են քաղաքական դաշտի հետ կապում, սակայն իրենք քաղաքականության հետ որևէ կապ չունեն։

«Մեր քաղաքական դաշտը մեկն է՝ Եռաբլուրը։ Մենք ունենք բազմաթիվ հուզող խնդիրներ՝ սոցիալական խնդիրներ։ Երեխաները մեծացել են, ծնողները մեծացել են, ունեն առողջական խնդիրներ և ընդամենը ստանում են 30 հազար դրամ թոշակ, բնականաբար այդ գումարով զոհվածի ընտանիքը չի կարող գոյատևել, ուր մնաց ապրելու մասին խոսենք, որովհետև գիտեք այսօրվա կոմունալ վճարների, այսօրվա թանկացումների մասին»։

Խլղաթյանը նշեց, որ հարգանքի տուրքն են մատուցել Արցախյան երկու պատերազմներում զոհված հերոսների հիշատակին, որոնք ազատագրեցին ու ժողովրդին պետություն նվիրեցին ու, որոնք  փորձեցին պահել ազատագրածը։

«Ինչ անենք։ Այսօր տեսանք այն, ինչ չպիտի լիներ, բոլորիս համար ցավ է։ Խոնարհումս բոլոր հայրերին ու մայրերին, կանանց, որոնք պահեցին ու մեծացրեցին երեխաներին, այսօր դժվար է առանց հայր երեք երեխա մեծացնել»։

Իսկ ի՞նչ պետք է անի կառավարությունը՝ նշեց, որ առհասարակ անտեսվել են ընտանիքները։

«Հասկանում եմ, որ այսօր ունենք ավելի շատ զոհ քան ունեցել ենք 90-ական թվականներին. երկու ամսում ունեցանք մոտ 11 հազար վիրավոր, 7000- 8000 զոհ։ Մեր պետությանը այնքան աջակցություն է եղել, որ կարող էր օգնել»։

Խլղաթյանը նաև նշեց, որ կառավարության մոտ էլ են ակցիայի դուրս եկել ու նման քայլի չէին դիմի.

«Քանի որ կառավարությունը որոշեց, որ մարտի մեկին մահացածներն ավելի արժեքավոր էին, քան արցախյան պատերազմում զոհված, հաշմանդամ դարձած ազատամարտիկները, նրանց անտեսեցին, հենց այդտեղ ժողովուրդն ըմբոստացավ»։

Սևազգեստ մայրերը նշեցին՝ Արցախյան պատերազմում զոհված տղաները հայրենիք տվեցին, ծնվեցին նոր սերնդի երիտասարդները։

«Նրանք այն երիտասարդներն էին, որոնք թավշյա հեղափոխության ժամանակ կանգնած էին վարչապետի կողքին։ Չես կարող անտարբեր անցնել, չի կարող մարդը Եռաբլուրում լինել ու անտարբեր անցնել»։

Աղբյուր` Փաստինֆո